ପହଲଗାଓଁ ଆକ୍ରମଣ ପରେ ଭାରତ-ପାକିସ୍ତାନ ମଧ୍ୟରେ ଉତ୍ତେଜନା ସୃଷ୍ଟି ହୋଇଥିଲା । ସରକାରଙ୍କ ପକ୍ଷରୁ ଅପରେସନ ସିନ୍ଦୂର ଜରିଆରେ ଆତଙ୍କୀଙ୍କ ଆଡ୍ଡା ଧ୍ୱଂସ କରିବା ସହ ଅନେକ ଆତଙ୍କୀଙ୍କୁ ନିପାତ କରାଯାଇଛି । ଏହି ସମୟରେ ଚୀନ ଓ ତୁର୍କୀ ଭଳି ଦେଶ ପାକିସ୍ତାନକୁ ସହଯୋଗ କରି ଭାରତକୁ ବଦନାମ କରିବାକୁ ପ୍ରୟାସ ଚଳାଇଥିଲେ । ଏଭଳି ସ୍ଥଳେ ତାଲିବାନ କିନ୍ତୁ ଭାରତକୁ ସମର୍ଥନ କରିଛି ।
ସୂଚନା ଅନୁସାରେ ଗୁରୁବାର ବୈଦେଶିକ ମନ୍ତ୍ରୀ ଏସ୍ ଜୟଶଙ୍କର ପ୍ରଥମ ଥର ପାଇଁ ତାଲିବାନର କାର୍ଯ୍ୟକାରୀ ବୈଦେଶିକ ମନ୍ତ୍ରୀ ଆମିର ଖାନ ମୁତାକିଙ୍କ ସହ ଫୋନରେ କଥା ହୋଇଥିଲେ । ଏହି ସମୟରେ ଆମିର ପହଲଗାଓଁ ଆକ୍ରମଣ ଘଟଣାକୁ ନିନ୍ଦା କରିଥିଲେ । ଏଥିପାଇଁ ଜୟଶଙ୍କର ତାଙ୍କୁ ଧନ୍ୟବାଦ ମଧ୍ୟ ଜଣାଇଛନ୍ତି । ପୂର୍ବରୁ ପାକିସ୍ତାନ ତାଲିବାନର ସହଯୋଗୀ ଥିବାବେଳେ ବର୍ତ୍ତମାନ କିନ୍ତୁ ଉଭୟଙ୍କ ମଧ୍ୟ ସମ୍ପର୍କ ଭଲନଥିବା କୁହାଯାଉଛି । ଏହା ଭାରତ ପାଇଁ ଲାଭଦାୟକ ହେବ ।
ତାଲିବାନ ଶାସନ ସମୟରେ (୧୯୯୬-୨୦୦୧)ରେ ଭାରତ ତାଲିବାନ ସହିତ ଆନୁଷ୍ଠାନିକ କୂଟନୈତିକ ସମ୍ପର୍କ ସ୍ଥାପନ କରିନଥିଲା । କିନ୍ତୁ ଭାରତ ତାଲିବାନ ବିରୋଧୀ ଗୋଷ୍ଠୀ, ଉତ୍ତର ଆଲାଏନ୍ସକୁ ସମର୍ଥନ କରିଥିଲା । ଏଠାରେ କହିରଖୁଛୁ ଯେ ୧୯୯୯ ମସିହାରେ ତାଲିବାନ ଇଣ୍ଡିଆ ଏୟାରଲାଇନ୍ସ ଫ୍ଲାଇଟ ୮୧୪ର ଅପହରଣକାରୀଙ୍କ ସହ ଆଲୋଚନାରେ ଭାରତକୁ ସାହାଯ୍ୟ କରିଥିଲା । ଯାହାକି ଲୋକଙ୍କୁ ସୁରକ୍ଷିତ ଫେରାଇ ଆଣିବାରେ ସାହାଯ୍ୟ କରିଥିଲା ।
ଭାରତ ଏବଂ ଆଫଗାନିସ୍ତାନ ମଧ୍ୟରେ ବାଣିଜ୍ୟିକ ସମ୍ପର୍କ ବହୁତ ଭଲ । ଭାରତ ଆଫଗାନିସ୍ତାନରୁ ବିପୁଳ ସାମଗ୍ରୀ କିଣୁଛି । ଯେପରିକି ଫଳ, ମସଲା, ଶୁଖିଲା ଫଳ ଏବଂ ପିଆଜ । ଏହାସହିତ ଡାଳିମ୍ବ, ଚେରି, ତରଭୁଜ ଏବଂ ତାଜା ଫଳ, ହିଙ୍ଗ, ଜିରା, କେସର ଭଳି ମସଲା ଏବଯ କିସମିସ୍, ଅଖରୋଟ, ବାଦାମ, ପିସ୍ତା ଏବଂ ଆପ୍ରିକଟ୍ ଭଳି ଶୁଖିଲା ଫଳ ମଧ୍ୟ ଆମଦାନୀ କରେ ।