ଭୁବନେଶ୍ୱର : ଆସନ୍ତାକାଲି ବିଜେପିର ବିଶାଳ ମହିଳା ଜନଆକ୍ରୋଶ ସମାବେଶ । ମହିଳା ବିଲକୁ ବିରୋଧୀ ଦଳ ସମର୍ଥନ ନଦେବା ପ୍ରସଙ୍ଗରେ ରାଜ୍ୟସ୍ତରରୁ ମଣ୍ଡଳସ୍ତର ପର୍ଯ୍ୟନ୍ତ କ୍ୟାମ୍ପେନ କରିବ ବିଜେପି । ଅପରାହ୍ଣ ୪ଟାରୁ ପ୍ରଦର୍ଶନୀ ପଡ଼ିଆରୁ ଲୋୟର ପିଏମଜି ଯାଏଁ ବିଶାଳ ରାଲି କରାଯିବ। ସବୁ ବର୍ଗର ୫୦ ହଜାରରୁ ଊର୍ଦ୍ଧ୍ବ ମହିଳାଙ୍କୁ ସାମିଲ କରାଯିବ । ୨୪ ଏବଂ ୨୫ରେ ସମସ୍ତ ସାଂଗଠନିକ ଜିଲ୍ଲାରେ ହେବ ମହିଳା ଜନ ଆକ୍ରୋଶ ସମ୍ମିଳନୀ ।
୨୭ରୁ୨୯ ଯାଏଁ ସମସ୍ତ ମଣ୍ଡଳସ୍ତରରେ ହେବ ଜନ ଆକ୍ରୋଶ ମହିଳା ପଦ ଯାତ୍ରା। ଏହା ସହ ରାଜ୍ୟର ସମସ୍ତ ମହିଳା ମହାବିଦ୍ୟାଳୟ ଏବଂ ବିଶ୍ବ ବିଦ୍ୟାଳୟ ଯାଇ ମଧ୍ୟ କ୍ୟାମ୍ପେନ କରିବ ମହିଳା ମୋର୍ଚ୍ଚା । ନାରୀ ଶକ୍ତି ବନ୍ଦନ ଅଧିନିୟମ” ସଂସଦରେ କାଟ ଖାଇବା ପ୍ରସଙ୍ଗରେ ପାର୍ଲିଆମେଣ୍ଟରୁ ପଞ୍ଚାୟତ ପର୍ଯ୍ୟନ୍ତ ଆନ୍ଦୋଳନ କରିବ ବିଜେପି । ଏହା କହିଛନ୍ତି ବିଜେପି ରାଜ୍ୟ ସଭାପତି ତଥା ସାଂସଦ ମନମୋହନ ସାମଲ ।
ଏଥିସହ ମନମୋହନ କହିଛନ୍ତି, ନାରୀ ଶକ୍ତି ବନ୍ଦନ ଅଧିନିୟମ” ସଂସଦରେ କାଟ ଖାଇବା ଦିଗରେ କଂଗ୍ରେସ, ଟିଏମସି ଏବଂ ଅନ୍ୟ ବିରୋଧୀ ଦଳଙ୍କ ଆଚରଣ ଉଚ୍ଚାରଣ ନିନ୍ଦନୀୟ। ମହିଳାଙ୍କ ବିରୋଧରେ ଆନନ୍ଦ ମନାଇଲେ ତାହା ସମସ୍ତଙ୍କୁ କଷ୍ଟ ହୋଇଛି। ତାର ପ୍ରତିଫଳନ ଆଗକୁ ହେବ। ସେପଟେ ବିଜେପରି ସମାବେଶ ନେଇ ପ୍ରତିକ୍ରିୟା ରଖିଛି ବିଜେଡି।
ଓଡ଼ିଶାର ମାତୃଶକ୍ତି କେନ୍ଦ୍ର ସରକାରଙ୍କ ମହିଳା ଆଭିମୁଖ୍ୟକୁ ଜାଣି ସାରିଛନ୍ତି। ଭୁଲ କଥାକୁ ଘୋଡାଇବାକୁ ଉଦ୍ୟମ କରାଯାଉଛି। ସେଥିରେ ସଫଳ ହେବ ନାହିଁ ବିଜେପି। ବିଜେପିର କୁମ୍ଭୀର କାନ୍ଦଣାକୁ ଓଡ଼ିଶାର ମାତୃଶକ୍ତି ପ୍ରତ୍ୟାଖ୍ୟାନ କରିବେ ବୋଲି କହିଛନ୍ତି ବରିଷ୍ଠ ବିଜେଡି ନେତା ସଂଜୟ ଦାସବର୍ମା ।