ସେହିପରି ବମ୍ବେ ହାଇକୋର୍ଟର କୋହ୍ଲାପୁର ଖଣ୍ଡପୀଠରେ ପ୍ରଥମେଶ ଗୋପାଳ ଗୱାଣକରଙ୍କ ସମେତ ୪ ଜଣ ଆବେଦନକାରୀ ଏକ ଜନସ୍ୱାର୍ଥ ମାମଲା ଦାୟର କରିଛନ୍ତି । ଏହି ପିଟିସନରେ ଏକ ସାଂଘାତିକ ତଥ୍ୟ ଉପସ୍ଥାପନ କରାଯାଇ ଦାବି କରାଯାଇଛି ଯେ, ନିର୍ବାଚନ ଆୟୋଗର ଅନ୍ୟ ଦୁଇଜଣ ଆୟୁକ୍ତ ବିଭିନ୍ନ ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ ୧୪ ଥର ନିଜର ଆପତ୍ତି ଉଠାଇଥିଲେ । ଭୋଟର ପଞ୍ଜୀକରଣ, ତାଲିକାରୁ ନାମ ବାଦ୍ ଦେବା ଏବଂ ଇଆରଓ ମାନଙ୍କର କାର୍ଯ୍ୟଶୈଳୀକୁ ନେଇ ସେମାନେ ପ୍ରଶ୍ନ ଉଠାଇଥିଲେ । ଏଥିସହ ସୁପ୍ରିମକୋର୍ଟରେ ମଧ୍ୟ ଅବମାନନା ମାମଲା ରୁଜୁ କରିବା ପାଇଁ ଆଇନଜୀବୀ ବ୍ରଜେଶ ସିଂହ ଆଟର୍ଣ୍ଣି ଜେନେରାଲଙ୍କ ଅନୁମତି ଲୋଡ଼ିଛନ୍ତି ।
ବିରୋଧୀଙ୍କ ଏହି ଆଭିମୁଖ୍ୟ ଉପରେ ଶାସକ ବିଜେପି କଡ଼ା ପ୍ରତିକ୍ରିୟା ରଖିଛି । ଦଳର ରାଷ୍ଟ୍ରୀୟ ମୁଖପାତ୍ର ସୁଧାଂଶୁ ତ୍ରିବେଦୀ କହିଛନ୍ତି ଯେ ନିର୍ବାଚନ ଆୟୋଗର ସମସ୍ତ ନିଷ୍ପତ୍ତି ସର୍ବସମ୍ମତି କ୍ରମେ ହିଁ ନିଆଯାଇଥାଏ । ସଂଖ୍ୟାଗରିଷ୍ଠତା ଭିତ୍ତିରେ ନିଷ୍ପତ୍ତି ନିଆଯାଉଥିବାର କୌଣସି ପ୍ରମାଣ ନାହିଁ । ବହୁ ଦଶନ୍ଧି ଧରି ଉତ୍ତରପ୍ରଦେଶ ଓ ପଶ୍ଚିମବଙ୍ଗ ଭଳି ବଡ଼ ରାଜ୍ୟରେ କ୍ଷମତାରୁ ଦୂରରେ ଥିବା କଂଗ୍ରେସ ଏବଂ ରାହୁଲ ଗାନ୍ଧୀ କ୍ରମାଗତ ପରାଜୟ ଯୋଗୁଁ ନିଜର ରାଜନୈତିକ ସନ୍ତୁଳନ ହରାଇ ଏଭଳି ଭିତ୍ତିହୀନ ଆରୋପ ଲଗାଉଛନ୍ତି ବୋଲି ବିଜେପି ସମାଲୋଚନା କରିଛି ।