ଭୁବନେଶ୍ବର: ମହାପ୍ରଭୁ ଜଗନ୍ନାଥ ଆନିମେସନ ଫିଲ୍ମକୁ ନେଇ ଆପତ୍ତି ଉଠାଇଲେ ଗଜପତି ମହାରାଜା । ମହାପ୍ରଭୁ ଶ୍ରୀଜଗନ୍ନାଥଙ୍କୁ ନେଇ ତିଆରି ହେଉଥିବା ଏକ ଆନିମେସନ ଚଳଚ୍ଚିତ୍ରକୁ ନେଇ ବିବାଦ ଦେଖାଦେଇଛି । ଭୁବନେଶ୍ୱରର ‘ଏଲି ଆନିମେସନ୍ସ ପ୍ରାଇଭେଟ୍ ଲିମିଟେଡ୍’ ଦ୍ୱାରା ନିର୍ମିତ ଏବଂ ଆସନ୍ତା ଜୁଲାଇ ୧୦ରେ ପ୍ରେକ୍ଷାଳୟକୁ ଆସିବାକୁ ଥିବା “ମହାପ୍ରଭୁ ଜଗନ୍ନାଥ” ଚଳଚ୍ଚିତ୍ରର ମୁକ୍ତିଲାଭ ଉପରେ ରୋକ୍ ଲଗାଇବାକୁ ଅପିଲ୍ କରିଛନ୍ତି ପୁରୀ ଗଜପତି ମହାରାଜା ଶ୍ରୀ ଦିବ୍ୟସିଂହ ଦେବ। ସୋସିଆଲ ମିଡିଆରେ ବୁଲୁଥିବା ଏହି ଫିଲ୍ମର ଅଫିସିଆଲ୍ ଟ୍ରେଲର୍ କୁ ଦେଖିବା ପରେ ଗଜପତି ମହାରାଜା ନିଜର ଗଭୀର ଅସନ୍ତୋଷ ବ୍ୟକ୍ତ କରିଛନ୍ତି। ଚଳଚ୍ଚିତ୍ରରେ ମହାପ୍ରଭୁଙ୍କର ଏକ ସମ୍ପୂର୍ଣ୍ଣ ମନଗଢ଼ା ଓ କାଳ୍ପନିକ କାହାଣୀ ପ୍ରଦର୍ଶନ କରାଯାଇଛି। ଯାହା ଆମର ପବିତ୍ର ଶାସ୍ତ୍ର ସହିତ ଆଦୌ ମେଳ ଖାଉନାହିଁ ।
ମହାପ୍ରଭୁ ଶ୍ରୀଜଗନ୍ନାଥଙ୍କ ମହିମାର ପ୍ରଚାର ସର୍ବଦା ମହର୍ଷି ବ୍ୟାସଦେବଙ୍କ ଦ୍ୱାରା ରଚିତ ପବିତ୍ର ଶାସ୍ତ୍ର ଓ ପୁରାଣ ଅନୁସାରେ ହିଁ ହେବା ଉଚିତ୍ । ଏଭଳି ବିକୃତ ଏବଂ କାଳ୍ପନିକ ଉପସ୍ଥାପନା ଦ୍ୱାରା ସାରା ବିଶ୍ୱରେ ଥିବା କୋଟି କୋଟି ଜଗନ୍ନାଥ ପ୍ରେମୀଙ୍କ ଧାର୍ମିକ ଅନୁଭୂତି ଓ ଭାବନାକୁ ଗଭୀର ଆଘାତ ପହଞ୍ଚିବ । ଶ୍ରୀଜଗନ୍ନାଥ ମନ୍ଦିର ପ୍ରଶାସନ ଦ୍ୱାରା ନିଯୁକ୍ତ ବିଶେଷଜ୍ଞ କମିଟି ଦ୍ୱାରା ଏହି ଚଳଚ୍ଚିତ୍ରର ସମସ୍ତ ବିଷୟବସ୍ତୁ ସଠିକ୍ ଭାବେ ଯାଞ୍ଚ ନହେବା ପର୍ଯ୍ୟନ୍ତ ଏହାର ରିଲିଜ୍ କୁ ସିନେମା ହଲ୍ କିମ୍ବା କୌଣସି ଡିଜିଟାଲ୍ ମିଡିଆ ପ୍ଲାଟଫର୍ମରେ ସ୍ଥଗିତ ରଖାଯାଉ ବୋଲି ଦାବି କରିଛନ୍ତି ଗଜପତି ମହାରାଜା । ଜଗନ୍ନାଥ ସଂସ୍କୃତିର ସୁରକ୍ଷା ଏବଂ ଏହାର ଶୁଦ୍ଧତା ବଜାୟ ରଖିବା ପାଇଁ ଗଜପତି ମହାରାଜା ପ୍ରଯୋଜନା ସଂସ୍ଥାକୁ ତୁରନ୍ତ ଏହି ପଦକ୍ଷେପ ନେବାକୁ ଆହ୍ୱାନ କରିଛନ୍ତି ।
ଆଗାମୀ ଓଡ଼ିଆ ଚଳଚ୍ଚିତ୍ର ମହାପ୍ରଭୁ ଜଗନ୍ନାଥ କୁ ନେଇ ପୁରୀ ଗଜପତି ମହାରାଜା ଶ୍ରୀ ଦିବ୍ୟସିଂହ ଦେବ ପ୍ରକାଶ କରିଥିବା ଉଦବେଗ ପରେ ଚଳଚ୍ଚିତ୍ର ନିର୍ମାତାଙ୍କ ପକ୍ଷରୁ ଏକ ପ୍ରେସ ବିବୃତି ଜାରି କରାଯାଇଛି । ସେ କହିଛନ୍ତି ଯେ,ଗଜପତି ମହାରାଜାଙ୍କ ଦ୍ୱାରା ଉଠାଯାଇଥିବା ସମସ୍ତ ପ୍ରସଙ୍ଗ ଓ ଉଦବେଗକୁ ଆମ ସଂସ୍ଥା ସର୍ବାଧିକ ସମ୍ମାନ ଜଣାଇଛି । ମହାପ୍ରଭୁଙ୍କ ପ୍ରଥମ ସେବକ ଭାବେ ଗଜପତି ମହାରାଜାଙ୍କ ଆଜୀବନ ଭକ୍ତି, ଜ୍ଞାନ ଓ ଗଭୀର ସାଂସ୍କୃତିକ ଉତ୍ତରଦାୟିତ୍ୱ ସମସ୍ତଙ୍କ ପାଇଁ ଏକ ପଥପ୍ରଦର୍ଶକ ଆଲୋକ ଏବଂ ପ୍ରେରଣାର ଉତ୍ସ ବୋଲି ନିର୍ମାତାମାନେ ପ୍ରକାଶ କରିଛନ୍ତି । ଗଜପତିଙ୍କ ଅନୁମତି କ୍ରମେ ହେବ ସ୍ୱତନ୍ତ୍ର ସ୍କ୍ରିନିଂ । ଗଜପତି ମହାରାଜାଙ୍କ ସହ ଏହି ବିଷୟରେ ଅଧିକ ଆଲୋଚନା କରାଯାଇଛି । ତାଙ୍କ ଅନୁମତି କ୍ରମେ ଏବଂ ତାଙ୍କ ସମୟ ସୁବିଧା ଅନୁଯାୟୀ ଚଳଚ୍ଚିତ୍ରର ଏକ ସ୍ୱତନ୍ତ୍ର ପ୍ରଦର୍ଶନୀ ଆୟୋଜନ କରାଯିବ ।