ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ କେନ୍ଦ୍ର କ୍ୟାବିନେଟ୍ ବୈଠକରେ ବୁଧବାର ଦିନ ଦେଶର ଭିତ୍ତିଭୂମି, ଉତ୍ପାଦନ ଏବଂ ଶିଳ୍ପ କ୍ଷେତ୍ରର ବିକାଶ ପାଇଁ ୭ଟି ଗୁରୁତ୍ୱପୂର୍ଣ୍ଣ ପ୍ରକଳ୍ପକୁ ମଞ୍ଜୁରୀ ପ୍ରଦାନ କରାଯାଇଛି। କେନ୍ଦ୍ର ସୂଚନା ଓ ପ୍ରସାରଣ ତଥା ରେଳ ମନ୍ତ୍ରୀ ଅଶ୍ୱିନୀ ବୈଷ୍ଣବ ଏହି ନିଷ୍ପତ୍ତିଗୁଡ଼ିକ ସମ୍ପର୍କରେ ସୂଚନା ଦେଇଛନ୍ତି। ଏହି ସମସ୍ତ ପ୍ରକଳ୍ପ ପାଇଁ ସମୁଦାୟ ୨,୧୯,୩୫୩ କୋଟି ଟଙ୍କା ବ୍ୟୟବରାଦ କରାଯାଇଛି।
ବିଶ୍ୱସ୍ତରରେ ଭାରତକୁ ସେମିକଣ୍ଡକ୍ଟର କ୍ଷେତ୍ରରେ ଏକ ପ୍ରମୁଖ ହବ୍ ଭାବେ ଗଢ଼ି ତୋଳିବା ପାଇଁ ସରକାର ସେମିକନ୍ ୨.୦ ବା ଇଣ୍ଡିଆ ସେମିକଣ୍ଡକ୍ଟର ମିଶନର ଦ୍ୱିତୀୟ ପର୍ଯ୍ୟାୟକୁ ଅନୁମୋଦନ ଦେଇଛନ୍ତି। ଏଥିପାଇଁ ୧,୨୭,୫୦୦ କୋଟି ଟଙ୍କାର ବଜେଟ୍ ଅନୁମୋଦନ କରାଯାଇଛି। ଏହାବ୍ୟତୀତ ଦେଶରେ ଇଲେକ୍ଟ୍ରୋନିକ୍ସ ଉତ୍ପାଦନକୁ ପ୍ରୋତ୍ସାହନ ଦେବା ଉଦ୍ଦେଶ୍ୟରେ ମୋବାଇଲ୍ ଫୋନ୍ ମାନୁଫ୍ୟାକ୍ଚରିଂ ସ୍କିମ୍ (MPMS) ପାଇଁ ମଧ୍ୟ ୬୨,୫୦୦ କୋଟି ଟଙ୍କାର ପାଣ୍ଠି ମଞ୍ଜୁର କରାଯାଇଛି।
ଉତ୍ତରପ୍ରଦେଶର ବାରାଣସୀ ସହରରେ ଟ୍ରାଫିକ୍ ସମସ୍ୟା ଦୂର କରିବା ଏବଂ ଭିତ୍ତିଭୂମିର ବିକାଶ ପାଇଁ କ୍ୟାବିନେଟ୍ ଦୁଇଟି ପ୍ରମୁଖ ନିଷ୍ପତ୍ତି ନେଇଛି। ବରୁଣା ନଦୀ କୂଳରେ ୪୩.୨୧୮ କିଲୋମିଟର ଲମ୍ବର ଏକ ୬/୪ ଲେନ୍ ବିଶିଷ୍ଟ ଏଲିଭେଟେଡ୍ କରିଡର ନିର୍ମାଣ କରାଯିବ, ଯାହାର ମୂଲ୍ୟ ୧୦,୯୯୮ କୋଟି ଟଙ୍କା ରଖାଯାଇଛି। ସେହିପରି ଗଙ୍ଗା ନଦୀ କୂଳରେ ମଧ୍ୟ ୧୪,୪୪୮ କୋଟି ଟଙ୍କା ବ୍ୟୟରେ ଏକ ୬-ଲେନ୍ ବିଶିଷ୍ଟ ଏଲିଭେଟେଡ୍ କରିଡରକୁ ଅନୁମୋଦନ ମିଳିଛି।
ଦେଶକୁ ୟୁରିଆ ଉତ୍ପାଦନ କ୍ଷେତ୍ରରେ ଆତ୍ମନିର୍ଭରଶୀଳ କରିବା ପାଇଁ କ୍ୟାବିନେଟ୍ ପକ୍ଷରୁ ଜାତୀୟ ୟୁରିଆ ନିବେଶ ନୀତି-୨୦୨୬କୁ ସବୁଜ ସଙ୍କେତ ମିଳିଛି। ଅନ୍ୟପକ୍ଷରେ, ଦୁଇଟି ପ୍ରମୁଖ ରେଳବାଇ ଭିତ୍ତିଭୂମି ପ୍ରକଳ୍ପକୁ ମଧ୍ୟ ଅନୁମୋଦନ କରାଯାଇଛି। ଏଥିରେ ୨,୫୪୨ କୋଟି ଟଙ୍କା ବ୍ୟୟରେ ପାରାଦୀପ-ହରିଦାସପୁର ରେଳ ଲାଇନର ଦୋହରୀକରଣ ଏବଂ ୧,୩୬୫ କୋଟି ଟଙ୍କା ବ୍ୟୟରେ ଡାଙ୍ଗୋଆପୋସି ଓ ରାଜଖରସୁଆଁ ମଧ୍ୟରେ ଚତୁର୍ଥ ରେଳ ଲାଇନ୍ ନିର୍ମାଣ ପ୍ରକଳ୍ପ ସାମିଲ ରହିଛି।