ନୂଆଦିଲ୍ଲୀ: ଲଣ୍ଡନରେ ଭୟଙ୍କର ଦୁର୍ଘଟଣା । ଧକ୍କା ହୋଇଛି ଦୁଇଟି ଟ୍ରେନ୍ । ଏହି ଦୁର୍ଘଟଣାରେ ୮୦ ରୁ ଅଧିକ ଯାତ୍ରୀ ଆହତ ହେବା ସହ ଟ୍ରେନ୍ ଡ୍ରାଇଭରଙ୍କ ମୃତ୍ୟୁ ଘଟିଛି । ଆହତଙ୍କ ମଧ୍ୟରୁ ୧୧ ଜଣଙ୍କ ଅବସ୍ଥା ଗୁରୁତର ଅଛି । ଅନ୍ୟ ୨୨ ଜଣ ମଧ୍ୟ ଗୁରୁତର ଆହତ ହୋଇଛନ୍ତି । ଏହି ଦୁର୍ଘଟଣା ଲଣ୍ଡନର ଉତ୍ତରରେ ଥିବା ବେଡଫୋର୍ଡରେ ଘଟିଛି । ଜରୁରୀକାଳୀନ ସେବା ଘଟଣାସ୍ଥଳରେ ପହଞ୍ଚି ଆହତମାନଙ୍କୁ ଉଦ୍ଧାର କରିଛି । ଜଣେ ଯାତ୍ରୀ କହିଛନ୍ତି ଯେ ଧକ୍କା ଯୋଗୁଁ ସେ ଆଗକୁ ଫୋପାଡ଼ି ହୋଇ ପଡ଼ିଥିଲେ । ତା’ପରେ ସେ ଅନ୍ୟ ଯାତ୍ରୀମାନଙ୍କୁ ହାଡ଼ଭଙ୍ଗା ଏବଂ ରକ୍ତାକ୍ତ ଅବସ୍ଥାରେ ଦେଖିଥିଲେ ।
ସୂଚନା ଅନୁଯାୟୀ, ଦୁଇଟି ଟ୍ରେନ୍ ଦକ୍ଷିଣ ଦିଗକୁ ଲଣ୍ଡନର ସେଣ୍ଟ ପାନ୍କ୍ରାସ୍ ଷ୍ଟେସନ ଅଭିମୁଖେ ଯାଉଥିଲା । ବେଡଫୋର୍ଡ ସହର ବାହାରେ ସ୍ଥାନୀୟ ସମୟ ପ୍ରାୟ ସନ୍ଧ୍ୟା ୫:୧୫ ରେ ଏହି ଧକ୍କା ହୋଇଥିଲା । ଗୋଟିଏ ଟ୍ରେନ୍ ଅଟକି ରହିଥିଲା ଏବଂ ଅନ୍ୟଟି ପଛରୁ ଧକ୍କା ଦେଇଥିଲା । ଦୁର୍ଘଟଣା ସମୟରେ ଟ୍ରେନ୍ ଗୁଡ଼ିକ ଦ୍ରୁତ ଗତିରେ ଚାଲୁ ନଥିଲେ, ହେଲେ ବହୁ ସଂଖ୍ୟକ ଲୋକ ଆହତ ହୋଇଥିଲେ ।
ଜରୁରୀକାଳୀନ ସେବା ଘଟଣାସ୍ଥଳକୁ ଅନେକ ଦଳ ପଠାଇଥିଲା, ଯେଉଁଥିରେ ଏକ ଏୟାର ଆମ୍ବୁଲାନ୍ସ ଏବଂ ପୂର୍ବ ଇଂଲଣ୍ଡ ଆମ୍ବୁଲାନ୍ସ ସେବାର ବିପଦ ଘଟଣା ଦଳ ମଧ୍ୟ ସାମିଲ ଥିଲା, ଯେଉଁମାନେ ଆହତମାନଙ୍କୁ ଉଦ୍ଧାର କରିଥିଲେ । ପୋଲିସ ଏକ ବିବୃତ୍ତିରେ କହିଛି, ଆମେ ଜାଣିଛୁ ଯେ ଅନେକ ଲୋକ ଆହତ ହୋଇଛନ୍ତି ଏବଂ ଦୁଃଖର ବିଷୟ, ଜଣେ ବ୍ୟକ୍ତିଙ୍କ ମୃତ୍ୟୁ ହୋଇଛି । ଏହାକୁ ଏକ ବଡ଼ ଘଟଣା ଘୋଷଣା କରାଯାଇଛି ଏବଂ ଅଧିକାରୀମାନେ ବେଡଫୋର୍ଡଶାୟାର ପୋଲିସ ଏବଂ ସ୍ଥାନୀୟ ଅଗ୍ନିଶମ ଏବଂ ଉଦ୍ଧାର ଏବଂ ଆମ୍ବୁଲାନ୍ସ ସେବାର ସହକର୍ମୀଙ୍କ ସହିତ ଘଟଣାସ୍ଥଳରେ ପ୍ରତିକ୍ରିୟା ଦେଉଛନ୍ତି।
ପିଟର ନାପ୍ କହିଛନ୍ତି ଯେ ଧକ୍କା ସମୟରେ ସେ ପଛ ଟ୍ରେନ୍ର ଜଣେ ଯାତ୍ରୀ ଥିଲେ । ଧକ୍କା ପୂର୍ବରୁ କୌଣସି ସତର୍କତା ନଥିଲା । କିଛି ସମୟ ପାଇଁ, ମୋତେ ଏପରି ଲାଗିଲା ଯେପରି ମୁଁ ମୋ ସାମ୍ନା ସିଟ୍ ସହିତ ଧକ୍କା ଖାଉଛି । ଲୋକମାନେ କାନ୍ଦୁଥିଲେ ଏବଂ ଚିତ୍କାର ମଧ୍ୟ କରୁଥିଲେ। ଲୋକମାନେ ବହୁତ ଭୟଭୀତ ଏବଂ ଦ୍ୱନ୍ଦ୍ୱରେ ପଡ଼ିଥିଲେ । ମୁଁ ଉଠି ଦେଖିଲି ଯେ ଅନେକ ଲୋକ କଥା କହିପାରୁ ନଥିଲେ, ସେମାନଙ୍କ ଗୋଡ଼ ଭାଙ୍ଗି ଯାଇଥିଲା । ମୁଁ ଟ୍ରେନରୁ ବାହାରି ପାରିଲି, କାରଣ ମୁଁ ବହୁତ ପତଳା । ମୁଁ ଦ୍ୱାରର ଫାଙ୍କ ଦେଇ ବାହାରକୁ ପଳାଇଗଲି ।
ସୋସିଆଲ ମିଡିଆରେ ପୋଷ୍ଟ ହୋଇଥିବା ଫଟୋ ଏବଂ ଭିଡିଓରେ ଅନେକ ଲୋକଙ୍କୁ ଦେଖାଯାଇଛି, କିଛି ଲୋକଙ୍କ ହାତରେ ବ୍ୟାଣ୍ଡେଜ୍ ଲାଗିଛି, କିନ୍ତୁ ଅନେକ ଆହତ ହୋଇ ନାହାଁନ୍ତି ବୋଲି ଜଣାପଡୁଛି । ସେମାନେ ଟ୍ରେନ୍ ଟ୍ରାକ୍ ପାଖରେ ଥିବା ରାସ୍ତାରେ ପାର୍କିଂ ହୋଇଥିବା ଜରୁରୀକାଳୀନ ଯାନଗୁଡ଼ିକ ମଧ୍ୟରେ ଠିଆ ହୋଇଥିଲେ । ରେଳ କର୍ମଚାରୀଙ୍କ ପ୍ରତିନିଧିତ୍ୱ କରୁଥିବା RMT ୟୁନିଅନ କହିଛି ଯେ ଏହା ପରିସ୍ଥିତି ଉପରେ ନଜର ରଖିଛି । ଟ୍ରେନ କର୍ମଚାରୀ ଏବଂ ଯାତ୍ରୀ ଉଭୟଙ୍କ ଗମ୍ଭୀର ଆଘାତ ରିପୋର୍ଟ ଉପରେ ୟିନିଆନ ଚିନ୍ତା ପ୍ରକାଶ କରିଛନ୍ତି ।