ଜୟପୁର : ଜୟପୁର ଅଞ୍ଚଳରେ ମାନବିକତାର ଏକ ଅନନ୍ୟ ଉଦାହରଣ ଦେଖିବାକୁ ମିଳିଛି। ଷ୍ଟେଟ୍ ବ୍ୟାଙ୍କ୍ ଅଫ୍ ଇଣ୍ଡିଆ (ଏସବିଆଇ) ପକ୍ଷରୁ ସ୍ଥାନୀୟ ମୁଖ୍ୟ ଶାଖା ପରିସରରେ ଏକ ମହତ ସ୍ୱେଚ୍ଛାକୃତ ରକ୍ତଦାନ ଶିବିର ସଫଳତାର ସହ ଅନୁଷ୍ଠିତ ହୋଇଯାଇଛି। ଗତ ଜୁନ୍ ୨୦ ତାରିଖ ଦିନ ଆୟୋଜିତ ଏହି ଶିବିରକୁ ଜୟପୁର ବ୍ଲକର ଗୋଷ୍ଠୀ ଉନ୍ନୟନ ଅଧିକାରୀ (ବିଡିଓ) ଶ୍ରୀ ଶକ୍ତି ମହାପାତ୍ର ମୁଖ୍ୟ ଅତିଥି ଭାବେ ଯୋଗଦେଇ ଆନୁଷ୍ଠାନିକ ଭାବେ ଶୁଭ ଉଦଘାଟନ କରିଥିଲେ। ଏହି ଅବସରରେ ସେ ବ୍ୟାଙ୍କର ଏଭଳି ଜନକଲ୍ୟାଣକାରୀ ପ୍ରୟାସକୁ ବେଶ୍ ପ୍ରଶଂସା କରିବା ସହ ରକ୍ତଦାନ ଜୀବନ ଦାନ ସଦୃଶ ବୋଲି ଅଭିହିତ କରିଥିଲେ। ଶିବିରରେ ବ୍ୟାଙ୍କ କର୍ମଚାରୀଙ୍କ ଠାରୁ ଆରମ୍ଭ କରି ସ୍ଥାନୀୟ ଅଞ୍ଚଳର ସବୁ ବର୍ଗର ସ୍ୱେଚ୍ଛାସେବୀମାନେ ଅତ୍ୟନ୍ତ ଉତ୍ସାହ ଓ ଆଗ୍ରହର ସହ ସାମିଲ ହୋଇ ରକ୍ତଦାନ କରିଥିଲେ, ଯାହାଫଳରେ ଏହି ମୁଖ୍ୟ ଶାଖାରୁ ମୋଟ ୨୯ ୟୁନିଟ୍ ରକ୍ତ ସଂଗୃହୀତ ହୋଇପାରିଛି।
ସୂଚନାଯୋଗ୍ୟ ଯେ, ଏହା ପୂର୍ବରୁ ଗତ ଜୁନ୍ ୧୪ ତାରିଖ ଦିନ ମଧ୍ୟ ଷ୍ଟେଟ୍ ବ୍ୟାଙ୍କ୍ ଅଫ୍ ଇଣ୍ଡିଆର ଆରବିଓ (RBO) ପରିସରରେ ଆଉ ଏକ ସ୍ୱେଚ୍ଛାକୃତ ରକ୍ତଦାନ ଶିବିର ଆୟୋଜନ କରାଯାଇଥିଲା। ସେହି ଶିବିରରେ ମଧ୍ୟ ସ୍ୱେଚ୍ଛାସେବୀମାନଙ୍କ ଅକୁଣ୍ଠ ସହଯୋଗ ଯୋଗୁଁ ବରାବର ୨୯ ୟୁନିଟ୍ ରକ୍ତ ସଂଗ୍ରହ ହୋଇଥିଲା। ବ୍ୟାଙ୍କ ପକ୍ଷରୁ ପରପୂରକ ଭାବେ ଆୟୋଜିତ ଏହି ଦୁଇଟିଯାକ ରକ୍ତଦାନ ଶିବିରକୁ ମିଶାଇ ସର୍ବମୋଟ ୫୮ ୟୁନିଟ୍ ରକ୍ତ ସଂଗୃହୀତ ହୋଇଛି, ଯାହା ଆଗାମୀ ଦିନରେ ଅନେକ ମୁମୂର୍ଷୁ ରୋଗୀଙ୍କ ଜୀବନ ରକ୍ଷା କରିବାରେ ବିଶେଷ ସହାୟକ ହେବ।
ଶିବିର ପରିଚାଳନା ସମୟରେ ରକ୍ତଦାତାମାନଙ୍କ ମନୋବଳ ବଢ଼ାଇବା ପାଇଁ ଶାଖା ପରିଚାଳକଙ୍କ ପକ୍ଷରୁ ସମସ୍ତ ସ୍ୱେଚ୍ଛାସେବୀ ରକ୍ତଦାତାଙ୍କୁ ଆନୁଷ୍ଠାନିକ ଭାବେ ଆକର୍ଷଣୀୟ ଉପହାର ଓ ମାନପତ୍ର ପ୍ରଦାନ କରାଯାଇ ଉଚ୍ଛ୍ୱସିତ ସମ୍ବର୍ଦ୍ଧନା ଜ୍ଞାପନ କରାଯାଇଥିଲା। ଏହି ସମଗ୍ର ମହତ୍ ଦାନ ପ୍ରକ୍ରିୟାଟି ଷ୍ଟେଟ୍ ବ୍ୟାଙ୍କ୍ ଅଫ୍ ଇଣ୍ଡିଆ ଜୟପୁରର ଆଞ୍ଚଳିକ ପରିଚାଳକ (ରିଜିଓନାଲ ମ୍ୟାନେଜର) ଶ୍ରୀ ପ୍ରକାଶ ଗ୍ରହାଚାର୍ଯ୍ୟ ଏବଂ ଚିଫ୍ ମ୍ୟାନେଜର ଶ୍ରୀ ଭି. ସାଇ କିରନ୍ଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଅତି ଶୃଙ୍ଖଳିତ ଭାବେ ସମ୍ପନ୍ନ ହୋଇଥିଲା।
ଏହି କାର୍ଯ୍ୟକ୍ରମକୁ ସଫଳ କରିବାରେ ଡେପୁଟି ମ୍ୟାନେଜରଙ୍କ ସମେତ ଶ୍ରୀ ପଙ୍କଜ କୁମାର ମାଝୀ, ଶ୍ରୀ ବି. ପବନ କୁମାର ଓ ବ୍ୟାଙ୍କର ସମସ୍ତ ନିଷ୍ଠାପର କର୍ମଚାରୀ ପ୍ରମୁଖ ଭୂମିକା ଗ୍ରହଣ କରିଥିଲେ। ଏଥିସହିତ ଜୟପୁର ଜିଲ୍ଲା ମୁଖ୍ୟ ଚିକିତ୍ସାଳୟ (DHH) ବ୍ଲଡ୍ ବ୍ୟାଙ୍କର ଅଭିଜ୍ଞ କର୍ମଚାରୀମାନେ ରକ୍ତ ସଂଗ୍ରହର ବୈଷୟିକ ଦିଗ ବୁଝିଥିବା ବେଳେ ଶୃଙ୍ଖଳା ରକ୍ଷା କରିବାରେ ଏନସିସି (NCC) କ୍ୟାଡେଟମାନେ ସମ୍ପୂର୍ଣ୍ଣ ସହଯୋଗ କରିଥିଲେ। ସମସ୍ତଙ୍କ ମିଳିତ ସହଯୋଗ ଓ ସୁପରିଚାଳନା ଯୋଗୁଁ ଏହି ମାନବୀୟ ସେବା ଶିବିରଟି ସଫଳତାର ସହ ସାଙ୍ଗ ହୋଇଛି।