ପୁରୀ: ଶ୍ରୀଜଗନ୍ନାଥ ମନ୍ଦିର ପ୍ରଶାସନ (ଏସଜେଟିଏ) ଦ୍ୱାରା ପ୍ରସ୍ତୁତ କ୍ୟାଲେଣ୍ଡରରେ ଏକ ତ୍ରୁଟି ଦେଖାଯିବା ପରେ ଭକ୍ତ ଏବଂ ସେବାୟତଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି। ଯାହାକୁ ନେଇ ସ୍ପଷ୍ଟୀକରଣ ରଖିଛି ମନ୍ଦିର ପ୍ରଶାସନ।
ତ୍ରୁଟି ସମ୍ପର୍କରେ ଚିନ୍ତା ପ୍ରକାଶ କରି ମନ୍ଦିର ସେବାୟତ ଏହାକୁ ସଂଶୋଧନ କରିବା ପାଇଁ ତୁରନ୍ତ ପଦକ୍ଷେପ ନେବାକୁ ଦାବି କରିଛନ୍ତି। କାରଣ କ୍ୟାଲେଣ୍ଡରରେ ଥିବା ଅସଙ୍ଗତି ଅନେକ ଭକ୍ତଙ୍କ ଧାର୍ମିକ ଭାବନାକୁ ଆଘାତ କରିବ। ପ୍ରଶାସନ କ୍ୟାଲେଣ୍ଡରର ବଣ୍ଟନ ବନ୍ଦ କରିବା ଉଚିତ ଏବଂ ଭଗବାନଙ୍କୁ ସେମାନଙ୍କର ମୂଳ ସ୍ଥାନରେ ରଖି ପୁନଃମୁଦ୍ରଣ କରିବା ଉଚିତ ବୋଲି ଦାବି ମଧ୍ୟ କରାଯାଇଛି।
ବିବାଦ ପରେ ଏସଜେଟିଏର ଜଣେ ଅଧିକାରୀ କହିଛନ୍ତି ଯେ ଏହା ଏକ ମନୁଷ୍ୟକୃତ ତ୍ରୁଟି ଏବଂ କ୍ୟାଲେଣ୍ଡରର ବଣ୍ଟନ ଏବଂ ବିକ୍ରୟ ବନ୍ଦ କରାଯିବା ଉଚିତ। ମନ୍ଦିର ସେବାୟତ ମାନେ ଆହୁରି ମଧ୍ୟ କହିଛନ୍ତି ଯେ କ୍ୟାଲେଣ୍ଡରକୁ ଚୂଡ଼ାନ୍ତ କରିବା ପୂର୍ବରୁ ମନ୍ଦିର ସହିତ ଜଡିତ ବିଦ୍ୱାନ ଏବଂ ଗବେଷକଙ୍କ ମତାମତ ବିଚାର କରାଯିବା ଉଚିତ ଥିଲା।
ଅପରପକ୍ଷରେ ଏସଜେଟିଏ ଅରବିନ୍ଦ ପାଢୀ ଏକ ସ୍ପଷ୍ଟୀକରଣ ଜାରି କରି କହିଛନ୍ତି ଯେ କ୍ୟାଲେଣ୍ଡରରେ ବ୍ୟବହୃତ ଚିତ୍ର ରାଜ୍ୟ ସଂଗ୍ରହାଳୟରେ ସଂରକ୍ଷିତ ୩୦୦-୪୦୦ ବର୍ଷ ପୁରୁଣା ତାଳପତ୍ର ଚିତ୍ର ଉପରେ ଆଧାରିତ। ତେବେ ଚିତ୍ର ଶିଳ୍ପୀଙ୍କ ଦ୍ୱାରା ପ୍ରଦାନ କରାଯାଇଥିବା ଚିତ୍ର କେବଳ କ୍ୟାଲେଣ୍ଡରରେ ସ୍ଥାନିତ ହୋଇଥିଲା। ଏହି ଚିତ୍ର କଳାକାରଙ୍କ ସୃଜନଶୀଳତାକୁ ପ୍ରତିଫଳିତ କରେ”।
ଉଲ୍ଲେଖଯୋଗ୍ୟ, ଜଗା ସ୍ଥାନରେ ବଳିଆ ଓ ବଳିଆ ସ୍ଥାନରେ ଜଗାକୁ ନେଇ ଅସନ୍ତୋଷ ଦେଖିବାକୁ ମିଳିଛି। ଟେବୁଲ୍ କ୍ୟାଲେଣ୍ଡର, ଓ୍ୱାଲ୍ କ୍ୟାଲେଣ୍ଡର ଓ ଡାଏରୀରେ ସମାନ ଚିତ୍ର। ଖାଲି ଏତିକି ନୁହେଁ ମହାପ୍ରଭୁଙ୍କ ବିଶ୍ୱପ୍ରସିଦ୍ଧ ରଥଯାତ୍ରା ସମୟର ଫଟୋରେ ମଧ୍ୟ ତ୍ରୁଟି ଦେଖିବାକୁ ମିଳିଥିଲା। ପ୍ରଥମେ ସୁଭଦ୍ରାଙ୍କ ରଥ, ପରେ ଜଗନ୍ନାଥଙ୍କ ରଥ ଏବଂ ଶେଷରେ ଶ୍ରୀବଳଭଦ୍ରଙ୍କ ରଥ ଟଣା ଯାଉଥିବାର ସମ୍ପର୍କିତ ଚିତ୍ରର ଫଟୋ ମଧ୍ୟ କ୍ୟାଲେଣ୍ଡର ରେ ସ୍ଥାନ ପାଇଛି।
