ଏହି ପ୍ରକଳ୍ପ ଅଧୀନରେ ଏକ ସ୍ୱତନ୍ତ୍ର ମୋବାଇଲ ଆପ୍ଲିକେସନ୍ ଜରିଆରେ ସମ୍ବେଦନଶୀଳ ପରିବାରଗୁଡ଼ିକର ସର୍ବେକ୍ଷଣ କରାଯିବ। ଚିହ୍ନଟ ହୋଇଥିବା ପରିବାରକୁ ଦକ୍ଷତା ବିକାଶ ତାଲିମ, ଆର୍ଥିକ ସେବା, ବଜାର ସୁବିଧା ଏବଂ ବିଭିନ୍ନ ସରକାରୀ ଯୋଜନା ସହ ଯୋଡ଼ାଯିବ। ଯଦି କୌଣସି ପରିସ୍ଥିତିରେ ଶ୍ରମିକମାନଙ୍କୁ ଅନ୍ୟତ୍ର କାମ କରିବାକୁ ଯିବାକୁ ପଡ଼େ ତେବେ ସେଠାରେ ସେମାନଙ୍କୁ ଉପଯୁକ୍ତ ମଜୁରୀ, ଆଇନଗତ ସହାୟତା ଏବଂ ସାମାଜିକ ସୁରକ୍ଷା ଯୋଗାଇ ଦେବା ନେଇ ବ୍ୟବସ୍ଥା କରାଯିବ।
ଏଥିସହ ପ୍ରବାସୀ ପରିବାରର ପିଲାମାନଙ୍କ ପାଇଁ ପୁଷ୍ଟିକର ଖାଦ୍ୟ, ସ୍ୱାସ୍ଥ୍ୟସେବା ଏବଂ ପ୍ରାଥମିକ ଶିକ୍ଷା ସୁନିଶ୍ଚିତ କରାଯିବ।
ମିଶନ ଶକ୍ତି ଏବଂ ସହଯୋଗୀ ସଂସ୍ଥାମାନଙ୍କର ଏହି ମିଳିତ ଉଦ୍ୟମ ଗ୍ରାମାଞ୍ଚଳରେ ଲୋକଙ୍କୁ ଆର୍ଥିକ ସ୍ତରରେ ସ୍ୱାବଲମ୍ବୀ କରିବା ସହ ଦାଦନ ସମସ୍ୟାର ମୂଳୋତ୍ପାଟନ ଦିଗରେ ବେଶ ସହାୟକ ହେବ। ବୁଝାମଣା ସମୟରେ ଏନଏସଇ ଫାଉଣ୍ଡେସନର ପ୍ରତିନିଧି ରେମା ମୋହନ ତଥା କ୍ରିସ୍ପର ପ୍ରତିନିଧି ଆର୍ ସୁବ୍ରମଣ୍ୟମ୍ ଓ ଜି ଭି ଜି ଶର୍ମାଙ୍କ ସମେତ ବିଭାଗୀୟ ବରିଷ୍ଠ ଅଧିକାରୀମାନେ ଭର୍ଚୁଆଲ ମୋଡରେ ଉପସ୍ଥିତ ଥିଲେ।