ଆନନ୍ଦପୁର ରିଙ୍ଗ ରୋଡରେ ସୃଷ୍ଟି ହୋଇଥିବା ଘାଇରେ ବନ୍ୟା ପାଣି ପଶିବା ପରେ ପ୍ରଭାବିତ ହୋଇଛନ୍ତି ଲୋକେ। ସନ୍ଧ୍ୟା ୬ଟା ସୁଦ୍ଧା ବୈତରଣୀ ନଦୀର ଜଳସ୍ତର ସତର୍କ ସଙ୍କେତ ଅତିକ୍ରମ କରିଥିଲା । ସତର୍କ ସଙ୍କେତ ୩୭ ଦଶମିକ ୪୪୫ ମିଟର ଥିବା ବେଳେ ଜଳସ୍ତର ୩୯ ଦଶମିକ ୯୮୦ ମିଟର ଅତିକ୍ରମ କରିଛି । ବୈତରଣୀ ନଦୀରେ ପୂର୍ବରୁ ସୃଷ୍ଟି ହୋଇଥିବା ଘାଇ ଦେଇ ପୁଣି ଥରେ ବନ୍ୟାଜଳ ପଶିବା ଆରମ୍ଭ କରିଛି । ଫଳରେ ନଦୀକୂଳିଆ ଅଞ୍ଚଳର ଲୋକଙ୍କ ମଧ୍ୟରେ ଭୟ ବଢ଼ିଛି ।
ସେହିଭଳି ଆନନ୍ଦପୁର ପୌରପରିଷଦ ର ୧୩ ନମ୍ବର ୱାର୍ଡ ର ସାଉଁନ୍ତି ସାହି ସମ୍ପୂର୍ଣ୍ଣ ଭାବେ ପ୍ରଭାବିତ ହୋଇଛି। ଆନନ୍ଦପୁର ଠାରେ ବିପଦ ସଂକେତ ୩୮.୩୬୦ ମିଟର ଥିବା ବେଳେ ନଦୀ ୪୦.୨୫୦ ମିଟର ରେ ପ୍ରବାହିତ ହେଉଛି। ଅନ୍ୟପଟେ ଖପରାଖାଇ- ପଞ୍ଚପୁଲି ରାସ୍ତାର ଟୁକୁଣା ନିକଟରେ ଥିବା ବିପଦ ସଂକୁଳ ସ୍ବିସ ଗେଟକୁ ନେଇ ରାସ୍ତାରେ ବାଲିବସ୍ତା ପକାଇ ଯାତାୟାତ ବନ୍ଦ କରିଦିଆଯାଇଛି। ବୈତରଣୀର ଜଳସ୍ତର ଉପରେ ଏବେ ପ୍ରଶାସନର ନଜର। ନଦୀକୂଳିଆ ଅଞ୍ଚଳର ଲୋକଙ୍କୁ ସତର୍କ ରହିବା ସହ ନଦୀ ଭିତରକୁ ନଯିବାକୁ ପରାମର୍ଶ ଦିଆଯାଉଛି । ତେବେ ଆଗାମୀ କିଛି ଘଣ୍ଟାରେ ବୈତରଣୀର ଜଳସ୍ତର କେତେ ବଢ଼ୁଛି ଏବଂ ବନ୍ୟା ପରିସ୍ଥିତି କେତେ ଗମ୍ଭୀର ହେଉଛି, ତା’ ଉପରେ ସମସ୍ତଙ୍କ ନଜର ।