ରାୟଗଡା: ଆମକୁ ରାସ୍ତା ଦରକାର… ତମେ କରୁନ କି ତାଙ୍କୁ କରିବାକୁ ଦେଉନ, ଆମକୁ ଆନ୍ଧ୍ର ସହ ମିଶେଇ ଦିଅ । … ବର୍ଷ ବର୍ଷର ରାସ୍ତା ତିଆରି ଦାବି ପୂରଣ ନକରିବାରୁ ରାସ୍ତାରେ ଲୋକଙ୍କ ରୋଷ । ରାସ୍ତା ନିର୍ମାଣ ଦାବିରେ ରାଜରାସ୍ତାରେ ବସିଛନ୍ତି ୬ଟି ଗାଁର ଶତାଧିକ ଗ୍ରାମବାସୀ । ଫଳରେ ଆନ୍ଧ୍ର୍ରପ୍ରଦେଶକୁ ଯାତାୟତ ଠପ୍ ହୋଇଯାଇଛି । ରାୟଗଡା ସଦର ବ୍ଲକ୍ କେରେଡା ନିକଟ ରାଂଚି-ବିଜୟୱାଡା ରାସ୍ତାରେ ଧାରଣା ଦେଇଛନ୍ତି ଏମାନେ । କେବଳ ରାସ୍ତା ନୁହେଁ ଅନ୍ୟାନ୍ୟ ମୌଳିକ ସୁବିଧା ଏମାନଙ୍କ ପାଖରେ ଅପହଂଚ । ବାରମ୍ବାର ଏନେଇ ପ୍ରଶାସନକୁ ଜଣାଇବା ସତ୍ତ୍ୱେ କୌଣସି ସୁଫଳ ମିଳିନି । ବାଧ୍ୟହୋଇ ଶେଷରେ ରାଜରାସ୍ତାରେ ବସିଛନ୍ତି ଆବାଳବୃଦ୍ଧବନିତା । ଆନ୍ଦୋଳନକୁ ନଜରରେ ରଖି ଘଟଣାସ୍ଥଳରେ ପୋଲିସ ମୁତୟନ ହୋଇଛନ୍ତି ।