କଟକ: କଟକ ଖପୁରିଆ ଶିଳ୍ପାଞ୍ଚଳସ୍ଥିତ ଓସିଆ (OSSIA) ଗ୍ରାଉଣ୍ଡ ଏବଂ ଏମସିଏମ (MCM) ହଲ୍ଠାରେ ଦୁଇ ଦିନିଆ ‘ପ୍ରଧାନମନ୍ତ୍ରୀ ବିଶ୍ୱକର୍ମା ପ୍ରଦର୍ଶନୀ-କମ୍-ଟ୍ରାଡେ ମେଳା’ ଓ କର୍ମଶାଳା ସଫଳତାର ସହ ଅନୁଷ୍ଠିତ ହୋଇଯାଇଛି। ଭାରତ ସରକାରଙ୍କ ଏମଏସଏମଇ (MSME) ମନ୍ତ୍ରଣାଳୟ ଏବଂ କଟକସ୍ଥିତ ଏମଏସଏମଇ-ବିକାଶ ଓ ସୁବିଧା କାର୍ଯ୍ୟାଳୟ (MSME-DFO) ପକ୍ଷରୁ ମିଳିତ ଭାବେ ଆୟୋଜିତ ଏହି କାର୍ଯ୍ୟକ୍ରମ ଫେବୃଆରୀ ୧୭ ରିଖରୁ ଆରମ୍ଭ ହୋଇଥିଲା। ଏହି ମେଳାର ମୁଖ୍ୟ ଉଦ୍ଦେଶ୍ୟ ଥିଲା ପ୍ରଧାନମନ୍ତ୍ରୀ ବିଶ୍ୱକର୍ମା ଯୋଜନାରେ ଅନ୍ତର୍ଭୁକ୍ତ କାରିଗରମାନଙ୍କୁ ସେମାନଙ୍କ ଉତ୍ପାଦର ପ୍ରଦର୍ଶନୀ ଓ ବିକ୍ରୟ ପାଇଁ ଏକ ଉପଯୁକ୍ତ ମାର୍କେଟିଂ ପ୍ଲାଟଫର୍ମ ଯୋଗାଇଦେବା।
ଏହି କାର୍ଯ୍ୟକ୍ରମର ଉଦଘାଟନୀ ଅଧିବେଶନରେ ଅତିଥି ଭାବେ ଓଡ଼ିଶା ସରକାରଙ୍କ ଶିଳ୍ପ ନିର୍ଦ୍ଦେଶାଳୟର ସଚିବ ତଥା ନିର୍ଦ୍ଦେଶକ ଶ୍ରୀମତୀ ଆବୋଲି ସୁନୀଲ ନରଭଣେ, କଟକ ଜିଲ୍ଲାପାଳ ଶ୍ରୀ ଦତ୍ତାତ୍ରୟ ଭାଉସାହେବ ସିନ୍ଦେ, ଏସଏଲବିସି (SLBC) ଓଡ଼ିଶାର ଇନଚାର୍ଜ ଶ୍ରୀ ଲିଙ୍ଗରାଜ ନାୟକ, ଇଣ୍ଡିଆ ପୋଷ୍ଟ ପେମେଣ୍ଟସ ବ୍ୟାଙ୍କର ରାଜ୍ୟ ମୁଖ୍ୟ ଶ୍ରୀ ସୁଶାନ୍ତ କୁମାର ବେହେରା, କଟକ ଏମଏସଏମଇ-ଡିଏଫଓ ନିର୍ଦ୍ଦେଶକ ଶ୍ରୀ ପି.କେ. ଗୁପ୍ତା ଏବଂ ଆରଡିଏସଡିଇ (RDSDE) ଆଞ୍ଚଳିକ ନିର୍ଦ୍ଦେଶକ ଶ୍ରୀ ଗୌତମ ଚନ୍ଦ୍ର ସାହା ପ୍ରମୁଖ ଯୋଗ ଦେଇଥିଲେ।
କଟକ ଏମଏସଏମଇ-ଡିଏଫଓ ନିର୍ଦ୍ଦେଶକ ଶ୍ରୀ ପି.କେ. ଗୁପ୍ତା ସ୍ୱାଗତ ଭାଷଣ ଦେବା ସହ କାର୍ଯ୍ୟକ୍ରମର ଆଭିମୁଖ୍ୟ ଉପରେ ଆଲୋକପାତ କରିଥିଲେ। ଅତିଥିମାନେ କାରିଗରଙ୍କ ଜୀବନଧାରଣର ମାନ ବୃଦ୍ଧି ପାଇଁ ସରକାରଙ୍କ ବିଭିନ୍ନ ଯୋଜନା ବିଷୟରେ ଆଲୋଚନା କରିବା ସହ ପ୍ରଦର୍ଶନୀରେ ଲାଗିଥିବା ବିଭିନ୍ନ ଷ୍ଟଲ୍ ପରିଦର୍ଶନ କରି କାରିଗରମାନଙ୍କୁ ଉତ୍ସାହିତ କରିଥିଲେ।
ମେଳା ଅବସରରେ କାରିଗରମାନଙ୍କୁ ଆର୍ଥିକ ସାକ୍ଷରତା ଏବଂ ବଜାର ସଂଯୋଗୀକରଣ ବିଷୟରେ ଶିକ୍ଷା ଦେବା ପାଇଁ ବିଭିନ୍ନ ବୈଷୟିକ ଅଧିବେଶନ ଆୟୋଜିତ ହୋଇଥିଲା। ଭୁବନେଶ୍ୱର ସିଡବି (SIDBI) ର ଡିଜିଏମ ଶ୍ରୀ ପି.କେ. ଚୌଧୁରୀ ଏବଂ ଆର୍ଥିକ ସାକ୍ଷରତା ପରାମର୍ଶଦାତା ଶ୍ରୀ ସତ୍ୟନାରାୟଣ ରାଉତରାୟ ସିଜିଟିଏମଏସଇ (CGTMSE) ଓ ଅନ୍ୟାନ୍ୟ ସରକାରୀ ଆର୍ଥିକ ସହାୟତା ଯୋଜନା ସମ୍ପର୍କରେ ସୂଚନା ଦେଇଥିଲେ। ସେହିପରି ଜିଇଏମ (GeM) ଫ୍ୟାସିଲିଟେଟର ଶ୍ରୀ ଏ.କେ. ମିଶ୍ର ସରକାରୀ ଇ-ମାର୍କେଟପ୍ଲେସ୍ ଜରିଆରେ କିଭଳି ନିଜ ସାମଗ୍ରୀ ବିକ୍ରୟ କରାଯାଇପାରିବ, ସେ ନେଇ ପ୍ରଶିକ୍ଷଣ ପ୍ରଦାନ କରିଥିଲେ।
ଏହି ବାଣିଜ୍ୟ ମେଳାଟି ସାଧାରଣ ଜନତାଙ୍କ ପାଇଁ ସମ୍ପୂର୍ଣ୍ଣ ମାଗଣାରେ ଉପଲବ୍ଧ ଥିଲା, ଯାହାଫଳରେ ବହୁ ସଂଖ୍ୟାରେ ଲୋକ ଆସି କାରିଗରଙ୍କ କଳାକୃତି ଦେଖିବା ସହ କିଣିବାର ସୁଯୋଗ ପାଇଥିଲେ। ପ୍ରଧାନମନ୍ତ୍ରୀ ବିଶ୍ୱକର୍ମା ହିତାଧିକାରୀଙ୍କୁ ମାର୍କେଟିଂ ସୁଯୋଗ ଯୋଗାଇ ଦେବାରେ ଏହି କାର୍ଯ୍ୟକ୍ରମ ଏକ ବଡ଼ ସଫଳତା ବୋଲି ସୂଚନା ଦିଆଯାଇଛି।