ନୂଆଦିଲ୍ଲୀ: ଆମେରିକୀୟ ପ୍ରଯୁକ୍ତି କମ୍ପାନି ଓରାକଲ୍ରେ ପୁଣି ବଡ଼ ଧରଣର କର୍ମଚାରୀ ଛଟେଇ ଆରମ୍ଭ ହୋଇଛି। ସୋମବାର ସକାଳ ପ୍ରାୟ ୬ଟାରେ କିଛି କର୍ମଚାରୀଙ୍କୁ ଏକ ଇ-ମେଲ୍ ମିଳିଥିଲା। ଇ-ମେଲ୍ରେ ସେମାନଙ୍କୁ କୁହାଯାଇଥିଲା, ‘ଆଜି ଆପଣଙ୍କ ଶେଷ କାର୍ଯ୍ୟଦିବସ।’ ଏହା ପୂର୍ବରୁ ଭୋର ପ୍ରାୟ ୪ଟାରୁ କେତେକ କର୍ମଚାରୀଙ୍କ କମ୍ପାନି ସିଷ୍ଟମ୍ରେ ପ୍ରବେଶ ବନ୍ଦ ହୋଇଯାଇଥିଲା। ପରେ ସକାଳ ୫ଟାରୁ ୫ଟା ୩୦ ମଧ୍ୟରେ ସେମାନଙ୍କୁ ସ୍ଲାକ୍ରୁ ମଧ୍ୟ ବିଚ୍ଛିନ୍ନ କରାଯାଇଥିବା ଜଣାପଡ଼ିଛି।
ଓରାକଲ୍ରେ ଏହା ପ୍ରଥମ ଛଟେଇ ନୁହେଁ। ୨୦୨୬ ମେ ଶେଷ ସୁଦ୍ଧା କମ୍ପାନିର କର୍ମଚାରୀ ସଂଖ୍ୟା ଗୋଟିଏ ବର୍ଷ ମଧ୍ୟରେ ପ୍ରାୟ ୧ ଲକ୍ଷ ୬୨ ହଜାରରୁ ୧ ଲକ୍ଷ ୪୧ ହଜାରକୁ ହ୍ରାସ ପାଇଥିଲା। ଅର୍ଥାତ୍ ପ୍ରାୟ ୨୧ ହଜାର କର୍ମଚାରୀ କମିଥିଲେ। ଏହି ଛଟେଇ ଓ ପୁନର୍ଗଠନ ପାଇଁ କମ୍ପାନି ପ୍ରାୟ ୧.୮୪ ବିଲିୟନ୍ ଡଲାର ଖର୍ଚ୍ଚ କରିଥିଲା। ଏବେ ଓରାକଲ୍ ଏଆଇ ଓ କ୍ଲାଉଡ୍ ଭିତ୍ତିଭୂମିରେ ବିପୁଳ ନିବେଶ କରୁଛି। ୨୦୨୭ ଆର୍ଥିକ ବର୍ଷରେ କମ୍ପାନିର ପୁଞ୍ଜି ଖର୍ଚ୍ଚ ୯୫ ବିଲିୟନ୍ ଡଲାର ପର୍ଯ୍ୟନ୍ତ ହୋଇପାରେ। ଏହି ବିପୁଳ ନିବେଶ ପାଇଁ କମ୍ପାନି ଋଣ ମଧ୍ୟ ବଢ଼ାଉଥିବା ବେଳେ ଖର୍ଚ୍ଚ କମାଇବା ପାଇଁ ଛଟେଇ କରାଯାଉଥିବା ଚର୍ଚ୍ଚା ହେଉଛି। ନୂଆ ଛଟେଇରେ କେତେ ଜଣ ପ୍ରଭାବିତ ହୋଇଛନ୍ତି, ଓରାକଲ୍ ଏପର୍ଯ୍ୟନ୍ତ ସ୍ପଷ୍ଟ କରିନାହିଁ।