ଏହି ତଥ୍ୟ ସାମ୍ନାକୁ ଆସିବା ପରେ ବିଜେଡି ଓ କଂଗ୍ରେସ ଘେରିଛନ୍ତି। ବିଜେଡି ବିଧାୟକ ଶାରଦା ଜେନା କହିଛନ୍ତି ଯେ, ମେଟ୍ରୋ ପ୍ରକଳ୍ପ ବନ୍ଦ ହେବା କାରଣରୁ ଜନ ଅସନ୍ତୋଷ ବଢ଼ୁଥିବାରୁ ବିଜେପି ସରକାର ଲୋକଙ୍କୁ ମିଛ କହୁଛନ୍ତି। ସେହିପରି ବରିଷ୍ଠ କଂଗ୍ରେସ ନେତା ସନ୍ତୋଷ ସିଂ ସାଲୁଜା କହିଛନ୍ତି, “ଡବଲ ଇଞ୍ଜିନ ସରକାର ଏକ ପ୍ରହସନରେ ପରିଣତ ହୋଇଛି। ମନ୍ତ୍ରୀଙ୍କ କଥାରେ ତାଳମେଳ ନାହିଁ। କେହି କହୁଛନ୍ତି DPR ନୂଆ ହେବ ତ କେହି କହୁଛନ୍ତି ପ୍ରକଳ୍ପ ବନ୍ଦ ହେବ।” ଓଡ଼ିଶା ଜନତା କଂଗ୍ରେସ ସଭାପତି ମହମ୍ମଦ ମୋକିମ ଏଥିପାଇଁ ଆନ୍ଦୋଳନର ଚେତାବନୀ ମଧ୍ୟ ଦେଇଛନ୍ତି।
ମେଟ୍ରୋ ବଦଳରେ ବସ୍ ଚଳାଇବା ଯୋଜନାକୁ ନେଇ ସଡ଼କ ସୁରକ୍ଷା ବିଶେଷଜ୍ଞ ସୁବ୍ରତ ନନ୍ଦ ପ୍ରଶ୍ନ ଉଠାଇଛନ୍ତି। ତାଙ୍କ ମତରେ, ଟ୍ୱିନସିଟିର ରାସ୍ତା ଯେତିକି ସଙ୍କୁଚିତ, ସେଠାରେ ଅତିରିକ୍ତ ୨୦୦ଟି ବସ୍ ଚାଲିଲେ ଟ୍ରାଫିକ ବ୍ୟବସ୍ଥା ସମ୍ପୂର୍ଣ୍ଣ ବିପର୍ଯ୍ୟସ୍ତ ହୋଇପଡ଼ିବ। ମେଟ୍ରୋ ହିଁ ଆଗାମୀ ଦିନ ପାଇଁ ଏକମାତ୍ର ସ୍ଥାୟୀ ସମାଧାନ, କିନ୍ତୁ ସରକାର ଏହାକୁ ଏଡ଼ାଇ ଯାଉଥିବା ଭଳି ମନେହେଉଛି।
ନିର୍ବାଚନ ସମୟରେ ମେଟ୍ରୋ ପ୍ରକଳ୍ପକୁ ନେଇ ବଡ଼ ବଡ଼ ପ୍ରତିଶ୍ରୁତି ଦେଇଥିବା ବିଜେପି ସରକାର ଏବେ କେନ୍ଦ୍ରର ଏହି ରିପୋର୍ଟ ପରେ କେମିତି ଆଗକୁ ରାଜନୈତିକ ଚାପର ସାମ୍ନା କରିବେ ତାହା ଉପରେ ରହିଛି ନଜର।