ଲାହୋର : ୟୁଏଇ ଶାରଜାହରୁ ପାକିସ୍ତାନ କରାଚୀ ଆସୁଥିବା ଏକ ପାକିସ୍ତାନୀ କାର୍ଗୋ ବିମାନ ମଙ୍ଗଳବାର ରାତିରେ ମଝି ଆକାଶରୁ ନିଖୋଜ ହୋଇଯାଇଛି । ବିମାନରେ ଚାଳକ ଦଳର ପାଞ୍ଚ ଜଣ କ୍ରୁ ସଦସ୍ୟ ଥିଲେ । ବିମାନର ସନ୍ଧାନ ଜାରି ରହିଛି ।
ପାକିସ୍ତାନ ବିମାନବନ୍ଦର କର୍ତ୍ତୃପକ୍ଷ (ପିଏଏ)ଅନୁଯାୟୀ, କାର୍ଗୋ ବିମାନଟି ମଙ୍ଗଳବାର ରାତି ୯.୧୮ରେ ସଂଯୁକ୍ତ ଆରବ ଏମିରେଟ୍ସର ଶାରଜାହରୁ କରାଚୀ ଅଭିମୁଖେ ଉଡ଼ାଣ ସମୟରେ ବିମାନଟି ଏୟାର ଟ୍ରାଫିକ୍ କଣ୍ଟ୍ରୋଲ (ଏଟିସି)କୁ ନାଭିଗେସନ୍ ସିଷ୍ଟମରେ ତ୍ରୁଟି ବିଷୟରେ ସୂଚନା ଦେଇଥିଲା । ତେବେ କିଛି ମିନିଟ୍ ପରେ ବିମାନଟି ରାଡାର ସହ ସମ୍ପର୍କ ହରାଇ ନିଖୋଜ ହୋଇଯାଇଥିଲା ।
ପାକିସ୍ତାନ ବିମାନବନ୍ଦର କର୍ତ୍ତୃପକ୍ଷ ଅନୁଯାୟୀ, ମଙ୍ଗଳବାର ସ୍ଥାନୀୟ ସମୟ ପ୍ରାୟ ରାତି ୯ଟା ୧୮ରେ କେ-୨ ଏୟାରୱେଜ୍ ବୋଇଂ ୭୩୭ କାର୍ଗୋ ବିମାନ କରାଚୀ କ୍ଷେତ୍ର ନିୟନ୍ତ୍ରଣ କେନ୍ଦ୍ର(ଏସିସି)ସହିତ ଯୋଗାଯୋଗରେ ଥିଲା । କିଛି ମିନିଟ୍ ପରେ, ବିମାନଟି ରାଡାରରେ ଦ୍ରୁତ ଗତିରେ ତଳକୁ ଖସିବା ଏବଂ ହଠାତ୍ ଗତିପଥ ପରିବର୍ତ୍ତନ କରୁଥିବା ଦେଖାଯାଇଥିଲା । କରାଚୀରୁ ପ୍ରାୟ ୧୫୫ ନଟିକାଲ୍ ମାଇଲ୍ ପଶ୍ଚିମରେ ବିମାନ ସହିତ ରାଡାର ଯୋଗାଯୋଗ ଏବଂ ଯୋଗାଯୋଗ ବିଚ୍ଛିନ୍ନ ହୋଇଯାଇଥିଲା । ବିମାନଟି କରାଚୀର ଘରୋଇ କାର୍ଗୋ ବିମାନ କମ୍ପାନି କେ-୨ ଏୟାରୱେଜ୍ ଦ୍ୱାରା ପରିଚାଳିତ ହେଉଥିଲା ।
ଘଟଣା ପରେ ନୌସେନା, ତଟରକ୍ଷୀ ବାହିନୀ ଏବଂ ଅନ୍ୟାନ୍ୟ ସମ୍ପୃକ୍ତ ସଂସ୍ଥାଗୁଡ଼ିକ ସହାୟତାରେ ସମୁଦ୍ରରେ ସନ୍ଧାନ ଏବଂ ଉଦ୍ଧାର କାର୍ଯ୍ୟ ଆରମ୍ଭ କରାଯାଇଛି । ୨୭ ବର୍ଷର ପୁରୁଣା ବିମାନ କେ-୨ର ଏକମାତ୍ର ଏୟାରକ୍ରାଫ୍ଟ ରହିଥିଲା । ୨୦୧୨ରେ କାର୍ଗୋ ବିମାନରେ ପରିଣତ ହେବା ପୂର୍ବରୁ ଏହା ଯାତ୍ରୀବାହନ ବିମାନ ରହିଥିଲା ।