ନୂଆଦିଲ୍ଲୀ : ଦିଲ୍ଲୀ ସଂଲଗ୍ନ ନୋଏଡାର ସେକ୍ଟର-୪ରେ ଥିବା ଏକ ବିଦ୍ୟୁତ୍ ମିଟର ନିର୍ମାଣକାରୀ କମ୍ପାନିରେ ଗୁରୁବାର ଭୋର ସମୟରେ ଏକ ଭୟଙ୍କର ଅଗ୍ନିକାଣ୍ଡ ଘଟିଛି । ଅଗ୍ନିକାଣ୍ଡ ଏତେ ଭୟଙ୍କର ଥିଲା ଯେ ସମ୍ପୂର୍ଣ୍ଣ କୋଠଧୂଆଁରେ ବୁଡ଼ି ଯାଇଥିଲା । ଦୁର୍ଘଟଣା ସମୟରେ କାରଖାନା ଭିତରେ ୨୫୦ କର୍ମଚାରୀ କାମ କରୁଥିଲେ, ସେମାନଙ୍କ ମଧ୍ୟରୁ ୨୬ରୁ ଅଧିକ ନିଆଁରେ ଫସି ଯାଇଥିଲେ । ଆହତମାନଙ୍କୁ ଆମ୍ବୁଲାନ୍ସ ମାଧ୍ୟମରେ ଚିକିତ୍ସା ଲାଗି ହସ୍ପିଟାଲକୁ ପଠାଯାଇଛି । ଘଟଣା ସମ୍ପର୍କରେ ସୂଚନା ପାଇବା ପରେ ଅଗ୍ନିଶମ ବିଭାଗ ଏବଂ ସ୍ଥାନୀୟ ପୋଲିସ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଛନ୍ତି ।
ସୂଚନା ଅନୁସାରେ ଥାନା ଫେଜ୍ 1 ଅଞ୍ଚଳର ସେକ୍ଟର 4ର B-40ରେ ଅବସ୍ଥିତ ବିଦ୍ୟୁତ ମିଟର ତିଆରି କରୁଥିବା କମ୍ପାନୀ କ୍ୟାପିଟାଲ୍ ପାୱାର ସିଷ୍ଟମ୍ ଲିମିଟେଡ୍ରେ ଅଗ୍ନିକାଣ୍ଡ ଘଟିଥିଲା । ଯେଉଁ ତିନି ମହଲା କୋଠାରେ ଅଗ୍ନିକାଣ୍ଡ ଘଟିଥିଲା ସେହି କୋଠାରେ ବିଦ୍ୟୁତ ମିଟର ତିଆରି ହୁଏ । ଅଗ୍ନିକାଣ୍ଡ ସମୟରେ ରାତ୍ରି ସିଫ୍ଟ କର୍ମଚାରୀମାନେ କାରଖାନା ଭିତରେ ଥିଲେ । ତଥାପି, ଏହି ଘଟଣାରେ କୌଣସି ମୃତାହତର ସୂଚନା ମିଳିନାହିଁ । ବରିଷ୍ଠ ପୋଲିସ ଅଧିକାରୀ ଏବଂ ଗୌତମ ବୁଦ୍ଧ ନଗର ମୁଖ୍ୟ ଅଗ୍ନିଶମ ଅଧିକାରୀ (ସିଏଫଓ) ମଧ୍ୟ ଘଟଣାସ୍ଥଳରେ ଉପସ୍ଥିତ ଅଛନ୍ତି ।
ଯୁଗ୍ମ ସିପି ରାଜୀବ ନାରାୟଣ ମିଶ୍ର କହିଛନ୍ତି ଯେ ଯେତେବେଳେ କମ୍ପାନୀରେ ଅଗ୍ନିକାଣ୍ଡ ଘଟିଥିଲା, ଲୋକମାନେ ରାତି ସିଫ୍ଟରେ କାମ କରୁଥିଲେ । ସେହି ସମୟରେ ସେଠାରେ ପ୍ରାୟ ୨୫୦ ଜଣ କାମ କରୁଥିଲେ । ଅଗ୍ନିକାଣ୍ଡ ଘଟିବା ପରେ ସମସ୍ତଙ୍କୁ ଉଦ୍ଧାର କରାଯାଇଥିଲା । ଧୂଆଁ ଏବଂ ଶ୍ୱାସରୁଦ୍ଧ ଯୋଗୁଁ ଅନେକ ଲୋକ ଆହତ ହୋଇଥିଲେ । ପ୍ରାୟ ଦୁଇ ଡଜନ ଲୋକଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି । ଯେଉଁମାନେ ଧୂଆଁ ଯୋଗୁଁ ଗୁରୁତର ଶ୍ୱାସରୁଦ୍ଧ କିମ୍ବା ସମସ୍ୟାର ସମ୍ମୁଖୀନ ହୋଇଥିଲେ ସେମାନଙ୍କୁ ICUରେ ଭର୍ତ୍ତି କରାଯାଇଛି । ନିଆଁକୁ ନିୟନ୍ତ୍ରଣ କରାଯାଇଛି । ପ୍ରାୟ ୨୦ଟି ଦମକଳ ଗାଡ଼ି ବ୍ୟବହାର କରାଯାଇଥିଲା । କମ୍ପାନୀର କାଚ ଭାଙ୍ଗି ଲୋକଙ୍କୁ ଉଦ୍ଧାର କରାଯାଇଥିଲା, ଏପର୍ଯ୍ୟନ୍ତ କମ୍ପାନୀରେ କେହି ଫସି ନାହାଁନ୍ତି । ବର୍ତ୍ତମାନ ପ୍ରାଥମିକତା ହେଉଛି ନିଆଁ ଲିଭାଇବା ତଥା ଆହତମାନଙ୍କୁ ସର୍ବୋତ୍ତମ ସମ୍ଭାବ୍ୟ ଚିକିତ୍ସା ଯୋଗାଇବା । ଅଗ୍ନିକାଣ୍ଡ ସର୍ଟ ସର୍କିଟ ଯୋଗୁଁ ହୋଇଛି ନା ଅନ୍ୟ କୌଣସି କାରଣ ଯୋଗୁଁ ହୋଇଛି ତାହା ପୁଲିସ ଏବଂ ଅଗ୍ନିଶମ ବିଭାଗ ଦ୍ୱାରା ତଦନ୍ତ କରାଯିବ ।