ସୁରଟ : ଏଟିଏମରୁ ଟଙ୍କା କଟିବା ବ୍ୟାଙ୍କକୁ ପଡିଲା ମହଙ୍ଗା । ୧୦ ହଜାର ଟଙ୍କା ଉଠାଇବାକୁ ଯାଇ ଗ୍ରାହକ ପାଇଲେ ୩ ଲକ୍ଷ ଟଙ୍କା । ୨୦୧୭, ଫେବୃୟାରୀ ୧୮ ତାରିଖରେ ସୁରଟର ଜଣେ ଗ୍ରାହକ ୧୦ ହଜାର ଟଙ୍କା ଉଠାଇବାକୁ ଏଟିଏମକୁ ଯାଇଥିଲେ । ହେଲେ ମେସିନରୁ ଟଙ୍କା ବାହାରି ନଥିଲା । ତେବେ ଗ୍ରାହକଙ୍କ ଆକାଉଣ୍ଟରୁ ୧୦ ହଜାର ଟଙ୍କା କଟି ଯାଇଥିଲା ।
ଟଙ୍କା କଟିଯିବାରୁ ଗ୍ରାହକ ଜଣକ ବାରମ୍ବାର ବ୍ୟାଙ୍କ ଅଫ୍ ବରୋଦା କାର୍ଯ୍ୟାଳୟକୁ ଦୌଡିଥିଲେ । କୌଣସି ସୁଫଳ ନମିଳିବାରୁ ବାଧ୍ୟ ହୋଇ ରିଜର୍ଭ ବ୍ୟାଙ୍କକୁ ଚିଠି ଲେଖିଲେ । ଏପରିକି ସୂଚନା ଅଧିକାର ଆଇନ ବଳରେ ମିଳିଥିବା ସିସିଟିଭି ଫୁଟେଜ୍ ପ୍ରମାଣ ଭାବେ ଦେଖାଇଲେ । ତେବେ ଟ୍ରାଞ୍ଜାକ୍ସନ ସଫଳ ହୋଇଥିବା କହି ବ୍ୟାଙ୍କ ତାଙ୍କ ଅନୁରୋଧ ଏଡାଇ ଯାଇଥିଲା ।
ଫଳରେ ସୁରଟ ଖାଉଟି ଅଦାଲତଙ୍କ ଦ୍ୱାରସ୍ଥ ହୋଇଥିଲେ ଗ୍ରାହକ। ଅଦାଲତ ଏହି ମାମଲାର ବିଚାର କରି ବ୍ୟାଙ୍କ ବିରୋଧରେ କଠୋର ଆଭିମୁଖ୍ୟ ଗ୍ରହଣ କରିଛନ୍ତି । ବ୍ୟାଙ୍କ ଅଫ୍ ବରୋଦାକୁ ଗ୍ରାହକଙ୍କୁ ୩ ଲକ୍ଷ ୨୮ ହଜାର ୮୦୦ ଟଙ୍କା କ୍ଷତିପୂରଣ ଦେବାକୁ ଅଦାଲତ ନିର୍ଦ୍ଦେଶ ଦେଇଛନ୍ତି । ଏହାସହିତ ମୂଳ ୧୦ ହଜାର ଟଙ୍କା ଉପରେ ମଧ୍ୟ ୯ ପ୍ରତିଶତ ସୁଧ ଦେବାକୁ ନିର୍ଦ୍ଦେଶ ଦେଇଛନ୍ତି ।
ରିଜର୍ଭ ବ୍ୟାଙ୍କର ନିୟମ ଅନୁଯାୟୀ ବିଫଳ ଟ୍ରାଞ୍ଜାକ୍ସନ କ୍ଷେତ୍ରରେ ୫ ଦିନ ମଧ୍ୟରେ ଟଙ୍କା ଫେରସ୍ତ ହେବା କଥା । ଯଦି ନହୁଏ ତେବେ ଗ୍ରାହକଙ୍କୁ ବ୍ୟାଙ୍କ ଦିନକୁ ଶହେ ଟଙ୍କା ଲେଖାଏଁ ଜରିମାନା ଦେବାର ନିୟମ ରହିଛି । ସୁରତର ଗ୍ରାହକଙ୍କ କ୍ଷେତ୍ରରେ ୩,୨୮୮ ଦିନର ବିଳମ୍ବ ହୋଇଥିବାରୁ ବ୍ୟାଙ୍କକୁ ୩ ଲକ୍ଷ ୨୮ ହଜାର ୮ଶହ ଟଙ୍କା କ୍ଷତିପୂରଣ ଦେବାକୁ ଖାଉଟି ଅଦାଲତ ନିର୍ଦ୍ଦେଶ ଦେଇଛନ୍ତି ।