ନୂଆଦିଲ୍ଲୀ : ଇରାନର ବଡ଼ ଦାବି । ନେତାନ୍ୟାହୁଙ୍କ କାର୍ଯ୍ୟାଳୟ ଉପରେ ମିସାଇଲ୍ ମାଡ଼ । ଇସ୍ରାଏଲ୍ ଏବଂ ଇରାନ ମଧ୍ୟରେ ଚାଲିଥିବା ସଂଘର୍ଷ ଏବେ ଏକ ଭୟଙ୍କର ରୂପ ନେଇଛି । ସୋମବାର ଦିନ ଇରାନର ସେନା ବାହିନୀ ‘ଇସଲାମିକ୍ ରିଭୋଲ୍ୟୁସନାରୀ ଗାର୍ଡ କର୍ପସ’ (IRGC) ପକ୍ଷରୁ ଏକ ଚମକାଇଲା ଭଳି ଦାବି କରାଯାଇଛି ।
ଇରାନ ପକ୍ଷରୁ କୁହାଯାଇଛି ଯେ, ସେମାନେ ଇସ୍ରାଏଲ୍ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁଙ୍କ କାର୍ଯ୍ୟାଳୟ ଏବଂ ଇସ୍ରାଏଲ୍ ବାୟୁସେନା ମୁଖ୍ୟଙ୍କ ବାସଭବନକୁ ଟାର୍ଗେଟ କରି କ୍ଷେପଣାସ୍ତ୍ର ମାଡ଼ କରିଛନ୍ତି । IRGC ର ସୂଚନା ଅନୁଯାୟୀ, ଏହି ଅପରେସନ ଅତ୍ୟନ୍ତ ଗୋପନୀୟ ଏବଂ ହଠାତ୍ କରାଯାଇଥିଲା । ଏଥିପାଇଁ ଇରାନର ଶକ୍ତିଶାଳୀ ‘ଖେବର ସେକନ୍’ (Kheybar Shekan) ବାଲିଷ୍ଟିକ୍ ମିସାଇଲ୍ ବ୍ୟବହାର କରାଯାଇଛି । ଇରାନ ଏହାକୁ ନିଜର “୧୦ମ ପର୍ଯ୍ୟାୟ” ପ୍ରତିଶୋଧମୂଳକ ଆକ୍ରମଣ ବୋଲି କହିଛି ।
ଗତ ଫେବୃଆରୀ ଶେଷ ସପ୍ତାହରେ ଇସ୍ରାଏଲ୍ ଏବଂ ଆମେରିକାର ମିଳିତ ଆକ୍ରମଣରେ ଇରାନର ସର୍ବୋଚ୍ଚ ନେତା ଆୟାତୁଲ୍ଲା ଅଲି ଖାମେନେଇଙ୍କ ମୃତ୍ୟୁ ଘଟିଥିବା ଖବର ପରେ ଏହି ପଦକ୍ଷେପ ନିଆଯାଇଥିବା ଜଣାପଡ଼ିଛି । ଏହି ଆକ୍ରମଣ ପରେ ଇସ୍ରାଏଲ୍ ପ୍ରଧାନମନ୍ତ୍ରୀ ନେତାନ୍ୟାହୁଙ୍କ ସ୍ଥିତି କ’ଣ ରହିଛି, ସେ ସୁରକ୍ଷିତ ଅଛନ୍ତି କି ନାହିଁ, ସେ ନେଇ IRGC ପକ୍ଷରୁ କୌଣସି ସ୍ପଷ୍ଟ ସୂଚନା ଦିଆଯାଇ ନାହିଁ । ତେବେ ଇସ୍ରାଏଲର ପ୍ରମୁଖ ସରକାରୀ କୋଠାଗୁଡ଼ିକୁ ଟାର୍ଗେଟ କରାଯାଇଥିବା ସେମାନେ ଦାବି କରିଛନ୍ତି ।
ଅନ୍ୟପଟେ, ଇସ୍ରାଏଲ୍ ପ୍ରତିରକ୍ଷା ବାହିନୀ (IDF) କିମ୍ବା ସରକାରଙ୍କ ପକ୍ଷରୁ ଏହି ନିର୍ଦ୍ଦିଷ୍ଟ ଆକ୍ରମଣ ନେଇ କୌଣସି ଅଧିକାରୀ ନିର୍ଦ୍ଧିଷ୍ଟ ସୂଚନା ଦେଇ ନାହାଁନ୍ତି । ଜେରୁଜେଲମ୍ ଏବଂ ତେଲ୍ ଅଭିଭ୍ ଭଳି ସହରରେ ସାଇରନ୍ ବାଜିବା ସହ ଆକାଶରେ ବିସ୍ଫୋରଣର ଶବ୍ଦ ଶୁଣାଯାଇଥିବା ସ୍ଥାନୀୟ ଲୋକେ କହିଛନ୍ତି । ଇସ୍ରାଏଲର ‘ଆଇରନ୍ ଡୋମ୍’ ଏବଂ ଅନ୍ୟାନ୍ୟ ପ୍ରତିରକ୍ଷା ବ୍ୟବସ୍ଥା ଅନେକ ମିସାଇଲକୁ ଆକାଶରେ ହିଁ ନଷ୍ଟ କରିଦେଇଥିବା ଅନୁମାନ କରାଯାଉଛି ।