ୱାସିଂଟନ: ୟୁରୋପରେ ନାଟୋକୁ ଯୋଗାଇ ଦିଆଯାଇଥିବା ଯୁଦ୍ଧ ବିମାନ ଓ ଯୁଦ୍ଧ ଜାହାଜ ସଂଖ୍ୟା ହ୍ରାସ କରିବାକୁ ଆମେରିକା ଯୋଜନା କରୁଛି ବୋଲି ଗୁରୁବାର ନ୍ୟୁୟର୍କ ଟାଇମ୍ସ ରିପୋର୍ଟ କରିଛି। ୨୦୨୨ରେ ୟୁକ୍ରେନ୍ ଉପରେ ରୁଷ୍ର ଆକ୍ରମଣ ପରେ ୟୁରୋପୀୟ ଦେଶଗୁଡ଼ିକ ସେମାନଙ୍କର ପ୍ରତିରକ୍ଷା କ୍ଷମତା ବୃଦ୍ଧି କରିବାକୁ ସଂଘର୍ଷ କରୁଥିବା ବେଳେ ମସ୍କୋ ଏକ ନାଟୋ ଦେଶ ଉପରେ ଆକ୍ରମଣ କରିପାରେ ବୋଲି ଆଶଙ୍କା ସୃଷ୍ଟି ହୋଇଛି।
ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏହି ମିଳିତ ମଞ୍ଚ (ନାଟୋ)କୁ ‘କାଗଜ ବାଘ’ ବୋଲି କହିଛନ୍ତି ଏବଂ ଏହାର ସଦସ୍ୟମାନେ ଇରାନ ବିରୋଧରେ ଆମେରିକା-ଇସ୍ରାଏଲ ଯୁଦ୍ଧରେ ଯୋଗ ଦେଇ ନ ଥିବାରୁ ନିରାଶ ହୋଇଛନ୍ତି। ୱାସିଂଟନ ୟୁରୋପକୁ ଯୋଗାଉଥିବା ଯୁଦ୍ଧ ବିମାନ ସଂଖ୍ୟା ଏକ ତୃତୀୟାଂଶ ହ୍ରାସ କରିବା, ସମସ୍ତ ଆଠଟି ଏରିଏଲ୍ ରିଫୁଏଲିଂ ଟ୍ୟାଙ୍କର୍ କାଟିବା ଏବଂ ସାମୁଦ୍ରିକ ଅନୁସନ୍ଧାନ ବିମାନ ହ୍ରାସ କରିବାକୁ ଯୋଜନା କରିଛି ବୋଲି ନ୍ୟୁୟର୍କ ଟାଇମ୍ସ ରିପୋର୍ଟ କରିଛି। ଏଥିସହ ଏକ କ୍ଷେପଣାସ୍ତ୍ର ଉତ୍କ୍ଷେପଣ ବୁଡ଼ାଜାହାଜ, ଏକ ବିମାନ ପରିବହନକାରୀ ଜାହାଜ, ବୋମାବର୍ଷୀ ବିମାନ ଓ ଅନେକ ଜେଟ୍ ଓ ଯୁଦ୍ଧ ଜାହାଜ ପ୍ରତ୍ୟାହାର କରିବାକୁ ଆମେରିକା ଯୋଜନା କରୁଛି ବୋଲି ଜଣାପଡ଼ିଛି।
ୟୁଏସ୍ ୟୁରୋପୀୟ କମାଣ୍ଡ ଏହି ମାସରେ କହିଛି ଯେ, ଏହା ନାଟୋରେ ୱାସିଂଟନର ଅବଦାନକୁ ପୁନଃ ମୂଲ୍ୟାଙ୍କନ କରିବ। ଆମେରିକାର ଜେନେରାଲ୍ ଆଲେକ୍ସସ ଗ୍ରିଙ୍କେୱିଚ ୟୁରୋପକୁ ଆମେରିକାର ସୈନ୍ୟବାହିନୀ ଉପରେ ଏକ ବୋଝ ବୋଲି ଅଭିଯୋଗ କରିଛନ୍ତି। ୩୨ ସଦସ୍ୟ ବିଶିଷ୍ଟ ନାଟୋ ୧୯୪୯ ମସିହାରେ ପ୍ରତିଷ୍ଠିତ ହୋଇଥିଲା। ଏହାର ସାମୂହିକ ସୁରକ୍ଷା ଏହି ନୀତି ଉପରେ ଆଧାରିତ ଯେ ଯଦି ଜଣେ ସଦସ୍ୟ ଉପରେ ଆକ୍ରମଣ ହୁଏ, ତେବେ ସମଗ୍ର ମିଳିତ ମଞ୍ଚ ଏହାର ପ୍ରତିରକ୍ଷା ପାଇଁ ଆଗେଇ ଆସିବ। ଆମେରିକାର ବୈଦେଶିକ ସଚିବ ମାର୍କୋ ରୁବିଓ ଗତ ସପ୍ତାହରେ କହିଥିଲେ ଯେ, ଟ୍ରମ୍ପ ଜୁଲାଇରେ ତୁର୍କୀରେ ହେବାକୁ ଥିବା ନାଟୋ ଶିଖର ସମ୍ମିଳନୀରେ ଯୋଗଦେବେ। ରୁବିଓ ଏହାକୁ ନାଟୋ ଇତିହାସର ସବୁଠାରୁ ଗୁରୁତ୍ୱପୂର୍ଣ୍ଣ ବୈଠକ ବୋଲି ବର୍ଣ୍ଣନା କରିଛନ୍ତି। ଏହି ବୈଠକ ଉପରେ ସମସ୍ତଙ୍କର ଆଖି ରହିଛି, ଯେଉଁଠାରେ ଟ୍ରମ୍ପ କିଛି ଗୁରୁତ୍ବପୂର୍ଣ୍ଣ ଘୋଷଣା କରିପାରନ୍ତି।