ଗତ କିଛି ଦିନ ହେବ କୋରାପୁଟ ଏବଂ ଏହାର ଆଖପାଖ ଅଞ୍ଚଳରେ ପ୍ରବଳ ବର୍ଷା ଲାଗି ରହିଛି, ଯେଉଁଥିପାଇଁ ପାହାଡ଼ିଆ ଅଞ୍ଚଳରେ ଥିବା ରେଳ ଟ୍ରାକ୍ଗୁଡ଼ିକ ଅଧିକ ବିପଦସଙ୍କୁଳ ହୋଇପଡ଼ିଛି । ପୂର୍ବତଟ ରେଳପଥର ବରିଷ୍ଠ ଅଧିକାରୀମାନେ ଘଟଣାସ୍ଥଳରେ ଉପସ୍ଥିତ ରହି ସ୍ଥିତିର ଅନୁଧ୍ୟାନ କରୁଛନ୍ତି। ବର୍ତ୍ତମାନ ଯୁଦ୍ଧକାଳୀନ ଭିତ୍ତିରେ ଟ୍ରାକ୍ ଉପରୁ ମାଟି ଓ ପଥର ହଟାଇବା କାର୍ଯ୍ୟ ଜାରି ରହିଛି ।
କୋରାପୁଟ: ଦକ୍ଷିଣ ଓଡ଼ିଶାରେ ଲାଗି ରହିଥିବା ଲଗାଣ ବର୍ଷା ଯୋଗୁଁ ଭୂସ୍ଖଳନ ସୃଷ୍ଟି ହୋଇଛି, ଯାହାର ସିଧାସଳଖ ପ୍ରଭାବ ରେଳ ଚଳାଚଳ ଉପରେ ପଡ଼ିଛି । ରାୟଗଡ଼ା ରେଳ ଡିଭିଜନ୍ ଅଧୀନସ୍ଥ ମାଲିଗୁଡ଼ା ଏବଂ ଛତ୍ରିପୁଟ ରେଳ ଷ୍ଟେସନ୍ ମଧ୍ୟରେ ରେଳଧାରଣା ଉପରେ ପାହାଡ଼ରୁ ଅତଡ଼ା ଖସିବା ଫଳରେ ରେଳ ସେବା ସମ୍ପୂର୍ଣ୍ଣ ବିପର୍ଯ୍ୟସ୍ତ ହୋଇପଡ଼ିଛି । ଯାତ୍ରୀମାନଙ୍କ ସୁରକ୍ଷା ଏବଂ ଟ୍ରାକ୍ ମରାମତି କାର୍ଯ୍ୟକୁ ତ୍ୱରାନ୍ୱିତ କରିବା ଉଦ୍ଦେଶ୍ୟରେ ପୂର୍ବତଟ ରେଳପଥ ପକ୍ଷରୁ ଏହି ରୁଟ୍ ଦେଇ ଯାଉଥିବା ଏକାଧିକ ଟ୍ରେନ୍କୁ ବାତିଲ୍ କରାଯାଇଥିବା ବେଳେ କିଛି ଟ୍ରେନ୍ର ଗତିପଥରେ ପରିବର୍ତ୍ତନ କରାଯାଇଛି ।
ମିଳିଥିବା ସୂଚନା ଅନୁଯାୟୀ, ଭୂସ୍ଖଳନ କାରଣରୁ ମୁଖ୍ୟତଃ ୪ ରୁ ୬ଟି ଟ୍ରେନ୍ର ଚଳାଚଳକୁ ସମ୍ପୂର୍ଣ୍ଣ ବାତିଲ୍ କରାଯାଇଛି । ଏଥିମଧ୍ୟରେ ରାଉରକେଲା-ଜଗଦଲପୁର ଏକ୍ସପ୍ରେସ୍, ଜଗଦଲପୁର-ରାଉରକେଲା ଏକ୍ସପ୍ରେସ୍, କିରଣ୍ଡୁଲ-ବିଶାଖାପାଟଣା ଏକ୍ସପ୍ରେସ୍, ଏବଂ ବିଶାଖାପାଟଣା-କିରଣ୍ଡୁଲ ଏକ୍ସପ୍ରେସ୍ ଭଳି ପ୍ରମୁଖ ଟ୍ରେନ୍ ରହିଛି । ସେହିପରି ଅନେକ ଟ୍ରେନ୍କୁ କୋରାପୁଟ ଠାରେ ସର୍ଟ-ଟର୍ମିନେଟ୍ କିମ୍ବା ସର୍ଟ-ଅରିଜିନେଟ୍ କରାଯାଉଛି। ଉଦାହରଣ ସ୍ୱରୂପ, ଜଗଦଲପୁରରୁ ବାହାରିବାକୁ ଥିବା ଟ୍ରେନ୍ଗୁଡ଼ିକ ଏବେ କୋରାପୁଟରୁ ହିଁ ନିଜର ଯାତ୍ରା ଆରମ୍ଭ କରିବେ ଏବଂ ଜଗଦଲପୁର-କୋରାପୁଟ ମଧ୍ୟରେ ଏହି ଟ୍ରେନ୍ ସେବା ସାମୟିକ ଭାବେ ବାତିଲ୍ ରହିବ ।