ଏହି ଆକ୍ରମଣରେ ଦୁଇଜଣ ଅବକାରୀ କର୍ମଚାରୀ ଆହତ ହୋଇଥିଲେ। ଚିକିତ୍ସା ପାଇଁ ସେମାନଙ୍କୁ ଖଲ୍ଲିକୋଟସ୍ଥିତ ଏକ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ଘଟଣା ପରେ ଅବକାରୀ ଟିମ୍ ସ୍ଥାନୀୟ ପୋଲିସର ସହାୟତା ଲୋଡ଼ିଥିଲା। ପରେ ଖଲ୍ଲିକୋଟରୁ ଏକ ପୋଲିସ ଟିମ୍ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲା। ଖବର ଅନୁଯାୟୀ, ଦୁଇଜଣ ଅଭିଯୁକ୍ତଙ୍କୁ ଅଟକ ରଖାଯାଇ ପଚରାଉଚରା ପାଇଁ ଥାନାକୁ ନିଆଯାଇଛି। ଏହି ଘଟଣାରେ ସମ୍ପୃକ୍ତ ଅନ୍ୟ ଦୁର୍ବୃତ୍ତମାନଙ୍କୁ ଠାବ ସହ ଗିରଫ କରିବା ପାଇଁ ବିଭିନ୍ନ ସ୍ଥାନରେ ଚଢ଼ଉ ମଧ୍ୟ କରାଯାଉଛି।
ବ୍ରହ୍ମପୁର: ଗଞ୍ଜାମ ଜିଲ୍ଲା ଅନ୍ତର୍ଗତ ଖଲ୍ଲିକୋଟ ଅଞ୍ଚଳରେ ଦୁର୍ବୃତ୍ତଙ୍କ ଆକ୍ରମଣରେ ଅବକାରୀ ବିଭାଗର ଦୁଇ ଜଣ ଅଧିକାରୀ ଆହତ ହୋଇଛନ୍ତି। ପ୍ରାଥମିକ ସୂଚନା ଅନୁଯାୟୀ, ମଙ୍ଗଳବାର ବିଳମ୍ବିତ ରାତିରେ ଖଲ୍ଲିକୋଟ ଥାନା ଅଧୀନ ଭାରସା ଗ୍ରାମ ନିକଟରେ ଦୁର୍ବୃତ୍ତଙ୍କ ଏକ ଗୋଷ୍ଠୀ ଅଧିକାରୀମାନଙ୍କ ଉପରେ ଆକ୍ରମଣ କରିଥିଲେ। ଏଥିସହିତ ଗିରଫ ହୋଇଥିବା ଦୁଇଜଣ ବେଆଇନ ମଦ ବ୍ୟବସାୟୀଙ୍କୁ ଛଡ଼ାଇ ନେଇଥିଲେ।
ସୂତ୍ରରୁ ପ୍ରକାଶ ଯେ, ଅବକାରୀ ବିଭାଗର ଏକ ଟିମ୍ ଭାରସା ଗ୍ରାମ ନିକଟରେ ଚଢ଼ଉ କରି ଦୁଇଜଣ ବ୍ୟବସାୟୀଙ୍କୁ ଗିରଫ କରିଥିଲା। ଦୁଇଜଣ ବ୍ୟକ୍ତି ବେଆଇନ ଭାବେ ଦେଶୀ ମଦ ପରିବହନ କରୁଥିବା ନେଇ ସୂଚନା ପାଇବା ପରେ ଏହି ଅଭିଯାନ ଚଳାଯାଇଥିଲା। ଅବକାରୀ ଅଧିକାରୀମାନେ ସେହି ଦୁଇଜଣଙ୍କୁ ଥାନାକୁ ନେଉଥିବା ସମୟରେ କିଛି ଦୁର୍ବୃତ୍ତ ହଠାତ୍ ଟିମ୍ ଉପରେ ଆକ୍ରମଣ କରିଥିଲେ। ଆକ୍ରମଣକାରୀମାନେ ଘଟଣାସ୍ଥଳରୁ ଫେରାର ହେବା ପୂର୍ବରୁ ଗିରଫ ହୋଇଥିବା ଦୁଇ ମଦ ବ୍ୟବସାୟୀଙ୍କୁ ଛଡ଼ାଇ ନେଇଥିଲେ।