ଭୁବନେଶ୍ୱର : ଆଗାମୀ ପଞ୍ଚାୟତ ଓ ପୌର ନିର୍ବାଚନରେ ପ୍ରାର୍ଥୀ ଦେବ ମହମ୍ମଦ ମୋକିମଙ୍କ ନୂଆ ଦଳ ଓଡ଼ିଶା ଜନତା କଂଗ୍ରେସ। ଏ ନେଇ ଆଜି ଦଳର କାର୍ଯ୍ୟାଳୟ ଉଦଘାଟନ କରି ସୂଚନା ଦେଇଛନ୍ତି ମୋକିମ। ଏହାସହ ଆସନ୍ତା ୧୫ ତାରିଖରେ ଦଳର ମୂଳଦୁଆ ପଡ଼ିବ ବୋଲି ସେ ସୂଚନା ଦେଇଛନ୍ତି। ଆଜି ଭୁବନେଶ୍ୱର ସତ୍ୟନଗରରେ ଓଡ଼ିଶା ଜନତା କଂଗ୍ରେସ ଦଳର ମୁଖ୍ୟ ତଥା ପୂର୍ବତନ କଂଗ୍ରେସ ବିଧାୟକ ମହମ୍ମଦ ମୋକିମ୍ ଦଳୀୟ କାର୍ଯ୍ୟାଳୟକୁ ଉଦଘାଟନ କରିଛନ୍ତି। ଏହି ଅବସରରେ ଦଳୀୟ କାର୍ଯ୍ୟକର୍ତ୍ତାମାନେ ଉପସ୍ଥିତ ଥିଲେ। ଓଜେସି ବିଜେପିର ବି-ଟିମ୍ କଥାକୁ ଖଣ୍ଡନ କରିଥିଲେ ମୋକିମ୍। ମୋକିମ କହିଥିଲେ କଂଗ୍ରେସ ଯାହା ଅଭିଯୋଗ କରୁଛି ତାହା ମିଛ। କଂଗ୍ରେସ କଣ କରୁଛି, ତାହା ଗତ ରାଜ୍ୟସଭା ନିର୍ବାଚନରେ ପ୍ରମାଣିତ ହୋଇଛି। କଂଗ୍ରେସ ଜଣେ ବାହାର ଲୋକଙ୍କୁ ବିଜେଡି କଥାରେ ସମର୍ଥନ କଲା। ନିଜ ଦଳର ବିଧାୟକଙ୍କୁ ନିଲମ୍ବନ କଲା।
ଅନ୍ୟ ଦଳକୁ ସମର୍ଥନ କରି କଂଗ୍ରେସ ଆଜି କିଛି ଜିଲ୍ଲା ସଭାପତିଙ୍କ ସହ ୩ ଜଣ ବିଧାୟକଙ୍କୁ ହରାଇଛି ବୋଲି ମୋକିମ଼ କହିଥିଲେ। ଏହାସହ ଝିଅ ତଥା ବାରବାଟୀ କଟକ ବିଧାୟିକା ସୋଫିଆ ଫିର୍ଦୋସଙ୍କ ଦଳରେ ଯୋଗଦେବା ପ୍ରଶ୍ନରେ ଉତ୍ତର ରଖି କହିଛନ୍ତି ବର୍ତ୍ତମାନ ମୋ ଝିଅ କଂଗ୍ରେସରେ ଅଛି। କଟକବାସୀଙ୍କ ସେବା କରିବା ପାଇଁ ଠିକ୍ ସମୟରେ ଠିକ୍ ନିଷ୍ପତି ନେବେ। ସେ ଆହୁରି କହିଛନ୍ତି ଯେ ଦଳ ୧୫ଟି ଜିଲ୍ଲାରେ କାର୍ଯ୍ୟକ୍ରମ କରିସାରିଛି। ଆମର ସଦସ୍ୟତା ଗ୍ରହଣ ଚାଲିଛି। ଆଗକୁ ପୌର ନିର୍ବାଚନ ଏଵଂ ପଞ୍ଚାୟତ ନିର୍ବାଚନରେ ଆମେ ଭାଗ ନେବୁ। ଓଜେସି ଓଡ଼ିଶାରେ ଏକ ରାଜନୈତିକ ବିକଳ୍ପ ହୋଇ ଛିଡ଼ା ହେବ।