ନୂଆଦିଲ୍ଲୀ: ଭାରତରେ ଖାଦ୍ୟ, ଫଳ ଓ ପନିପରିବା ଆଦି ଉପରେ ଅତ୍ୟଧିକ ପରିମାଣରେ କେମିକଲ୍ସ ସ୍ପ୍ରେ ଓ ମିଶ୍ରଣ ଯୋଗୁ ଏସବୁ ନେଇ ଲୋକଙ୍କ ଭରସା ଏକପ୍ରକାର ଉଠିଗଲାଣି। ପ୍ରତିଦିନ ଏଭଳି ଘଟଣା ସାମ୍ନାକୁ ଆସୁଛି। ଏଭଳି ପରିସ୍ଥିତି ଦେଶ ଭିତରେ ଛବି ଖରାପ କରୁଥିବା ବେଳେ ଏବେ ବିଦେଶରେ ମଧ୍ୟ ଏହା ପହଞ୍ଚିଗଲାଣି। ଭାରତରୁ ରପ୍ତାନୀ ହେଉଥିବା ଉତ୍ପାଦନ ଉପରେ ସନ୍ଦେହ ପ୍ରକାଶ କଲେଣି ଆମଦାନୀ କରୁଥିବା ରାଷ୍ଟ୍ର। ନିକଟରେ ଜାପାନ ଭାରତରୁ କିଣୁଥିବା ଆମ୍ଭ ଉପରେ ବ୍ୟାନ୍ ଲଗାଇଥିବା ବେଳେ ଏବେ ପଡ଼ୋଶୀ ବାଂଲାଦେଶ ମଧ୍ୟ ଭାରତୀୟ ଆମ୍ଭ ଉପରେ ବ୍ୟାନ ଲଗାଇଛି।
ନେପାଳର ବର୍ଡର କ୍ୱାରେଣ୍ଟାଇନ ଅଫିସର ଭାରତରୁ ଆମଦାନୀ ହୋଇଥିବା ଆମ୍ବର ପ୍ରଥମେ ପରୀକ୍ଷା କରିଥିଲେ। ଏଥିରେ ଅତ୍ୟଧିକ ପରିମାଣରେ କେମିକଲ୍ସ ପେଷ୍ଟିସାଇଡ୍ ମିଳିଥିଲା। ଏହାପରେ ନେପାଳ ସରକାର ଆମ୍ଭ ପରେ ତୁରନ୍ତ ବ୍ୟାନ ଲଗାଇଛନ୍ତି। କାଠମାଣ୍ଡୁର କୃଷି ଏବଂ ପଶୁସମ୍ପଦ ବିକାଶ ମନ୍ତ୍ରଣାଳୟ ଦ୍ୱାରା ଆମଦାନୀ କଟକଣା ଏପ୍ରିଲ-ମେ ମାସରୁ ଲାଗୁ ହୋଇଛି।ନେପାଳ ଚାଷୀଙ୍କ ପାଇଁ ସୁଯୋଗ
ନେପାଳୀ କର୍ତ୍ତୃପକ୍ଷ ଏହି ପଦକ୍ଷେପକୁ ଘରୋଇ ଫଳ କିସମ ପାଇଁ ଲାଭଦାୟକ ବୋଲି କହିଛନ୍ତି। ମାଧେସ୍ ପ୍ରଦେଶର ଭୂମି ପରିଚାଳନା, କୃଷି ଏବଂ ସମବାୟ ମନ୍ତ୍ରଣାଳୟର ମୁଖପାତ୍ର ମନୀଷ କୁମାର ପାଲ ନେପାଳ ମିଡିଆ ‘ଦି ରାଇଜିଂ ନେପାଳ’କୁ କହିଛନ୍ତି ଯେ ଏହି ପ୍ରତିବନ୍ଧକ ସ୍ଥାନୀୟ ଭାବରେ ଉତ୍ପାଦିତ, “ସ୍ୱାସ୍ଥ୍ୟକର ଫଳ” ପାଇଁ ଅଧିକ ସୁଯୋଗ ସୃଷ୍ଟି କରିଛି।
ସେ କହିଛନ୍ତି “ସଂଘୀୟ ସରକାରଙ୍କ ନିଷ୍ପତ୍ତି ସ୍ଥାନୀୟ ଉତ୍ପାଦନକୁ ଅତିରିକ୍ତ ପ୍ରୋତ୍ସାହନ ଯୋଗାଇବ, ନାଗରିକମାନେ ସୁସ୍ଥ ଏବଂ ସୁରକ୍ଷିତ ଉତ୍ପାଦନ ସୁବିଧା ପାଇପାରିବେ।”
ତଥାପି, ନେପାଳର ଆମ୍ବ ବ୍ୟବସାୟୀମାନେ ସମ୍ଭାବ୍ୟ ଅଭାବ, ମୂଲ୍ୟ ବୃଦ୍ଧି ଏବଂ ବଡ଼ କ୍ଷତି ବିଷୟରେ ଚିନ୍ତିତ ଅଛନ୍ତି। ଯଦିଓ ନେପାଳ ଏକ ଆମ୍ବ ଉତ୍ପାଦନକାରୀ ଦେଶ ଏବଂ ଆମଦାନୀ ଅପେକ୍ଷା ଅଧିକ ଫଳ ରପ୍ତାନି କରେ, ତଥାପି ସ୍ଥାନୀୟ ଚାହିଦା ପୂରଣ କରିବା ପାଇଁ ଘରୋଇ ଉତ୍ପାଦନ ଯଥେଷ୍ଟ ନୁହେଁ। ଏହା ବ୍ୟତୀତ, ନେପାଳୀ ଆମ୍ବ ପାଇଁ ଋତୁ ମାତ୍ର ଦୁଇ ମାସ ପାଇଁ ରହିଥାଏ। ତେଣୁ ଫଳ ବିକ୍ରେତାମାନେ ଏବେ ଭାରତୀୟ ଫଳ ଉପରେ ସମ୍ପୂର୍ଣ୍ଣ ନିଷେଧ କରିବା ପରିବର୍ତ୍ତେ କଠୋର କ୍ୱାରେଣ୍ଟାଇନ୍ ବ୍ୟବସ୍ଥା କରାଯାଉ ବୋଲି ଦାବି କରୁଛନ୍ତି।
ଭାରତ ଏକାଧିକ ଦେଶକୁ ଆମ୍ବ ରପ୍ତାନୀ କରିଥାଏ। ଭାରତର ପ୍ରମୁଖ ପାଞ୍ଚଟି ଆମ୍ବ ରପ୍ତାନିକାରୀ ଦେଶ ହେଉଛି ଆମେରିକା, ୟୁଏଇ, ୟୁକେ, ନେଦରଲ୍ୟାଣ୍ଡ ଏବଂ ସାଉଦି ଆରବ। ଯଦିଓ ନେପାଳ ଭାରତର ସର୍ବବୃହତ ଆମ୍ବ ବଜାର ତାଲିକାରେ ନାହିଁ, ତଥାପି ଭାରତୀୟ ଆମ୍ବ ଉପରେ ରାସାୟନିକ କୀଟନାଶକ ମିଳିବା ପରବର୍ତ୍ତୀ ଫଳ ଉତ୍ପାଦନ ଇକୋସିଷ୍ଟମ ପାଇଁ ପ୍ରଶ୍ନ ଉଠାଇଛି।
ସେପଟେ ଅତ୍ୟଧିକ ଗରମ ଯୋଗୁ ଭାରତରେ ଆମ୍ବ ଚାଷ ପ୍ରଭାବିତ ହୋଇଛି। କୋଙ୍କଣ ବେଲ୍ଟରେ ଆଲଫୋନ୍ସୋ ଚାଷୀଙ୍କ ଅଧିକ କ୍ଷତି ଗ୍ରସ୍ତ ହୋଇଛନ୍ତି। ବିଳମ୍ବ ବର୍ଷା ଏବଂ ପ୍ରଚଣ୍ଡ ଗରମ ପ୍ରବାହ ୯୦ ପ୍ରତିଶତ ପର୍ଯ୍ୟନ୍ତ ବିନାଶକାରୀ କ୍ଷତି ଘଟାଇଛି। ଆଉ ଏଭଳି ସ୍ଥଳେ ବ୍ୟାନ୍ ନିର୍ଦ୍ଦେଶ ଆସିବା ଭାରତୀୟ ଚାଷୀଙ୍କ ପାଇଁ ନିରାଶଜନକ ।
ଗତ ମାସରେ, ଜାପାନ ଭାରତର କେସର, ଅଲଫୋନ୍ସୋ, ଲେଙ୍ଗଡ଼ା ଏବଂ ବାଇଗଣପଲେଇ ଆମ୍ବ ଉପରେ ଗତ ୨୦ ବର୍ଷ ମଧ୍ୟରେ ପ୍ରଥମ ଥର ପାଇଁ କଟକଣା ଲଗାଇଛି। ଭାରତୀୟ ଉତ୍ପାଦନ କେନ୍ଦ୍ରଗୁଡ଼ିକରେ ଅନିୟମିତତା ଦେଖିବାକୁ ପାଇବା ପରେ ଏହି କଟକଣା ଜାରି କରାଯାଇଛି।
ମାର୍ଚ୍ଚ ମାସରେ, ଜାପାନର କ୍ୱାରେଣ୍ଟାଇନ୍ ଅଧିକାରୀଙ୍କ ଏକ ଦଳ ଉତ୍ତରପ୍ରଦେଶର ରହମାନପୁରଠାରେ ପରିଦର୍ସଶନ କରିଥିଲେ, ଯେଉଁଠାରେ ସେମାନେ ଟ୍ରିଟମେଣ୍ଟ (ପ୍ରକ୍ରିୟାକରଣ) ସୁବିଧା କେନ୍ଦ୍ରଗୁଡ଼ିକରେ ଫ୍ୟୁମିଗେସନ୍ ଏବଂ ସମ୍ବନ୍ଧିତ ବିଶୋଧନ ପଦକ୍ଷେପଗୁଡ଼ିକରେ ତ୍ରୁଟି ପାଇଥିଲେ।
କ୍ୱାରେଣ୍ଟାଇନ୍ ଯୋଜନାକୁ ସମର୍ଥନ କରୁଥିବା ଏକ ସାର୍ବଜନୀନ ଅନୁଷ୍ଠାନ ‘ୟୋକୋହାମା ପ୍ଲାଣ୍ଟ ପ୍ରୋଟେକ୍ସନ୍ ଆସୋସିଏସନ୍’ ଜଣାଇଛି ଯେ, ଚଳିତ ବର୍ଷ ମାର୍ଚ୍ଚ ୨୫ ତାରିଖ କିମ୍ବା ତା’ପରେ ଭାରତ ଦ୍ୱାରା ଜାରି କରାଯାଇଥିବା ନିରୀକ୍ଷଣ ପ୍ରମାଣପତ୍ର ସହିତ ଆସୁଥିବା ଆମ୍ବ ରପ୍ତାନୀକୁ ଆଉ ଗ୍ରହଣ କରାଯିବ ନାହିଁ। ଆସୋସିଏସନ୍ ଅନୁଯାୟୀ, କାର୍ଯ୍ୟକ୍ଷମ ମାନକଗୁଡ଼ିକରେ ସୁଧାର ଅଣାଗଲା ପରେ ହିଁ ଭାରତୀୟ ଆମ୍ବକୁ ଗ୍ରହଣ କରାଯିବ।
ଏହା ପୂର୍ବରୁ ୧୯୬୮ ମସିହାରେ ଜାପାନ ଭାରତୀୟ ଆମ୍ବ ଉପରେ ବ୍ୟାନ ଲଗାଇଥିଲା। ସେତେବେଳେ ମାଛି ଦଂଶନ ଅଭିଯୋଗ ଲଗାଇ ବ୍ୟାନ ଲଗାଇଥିଲା ଜାପାନ। ଏହାର ୨୦ ବର୍ଷ ପରେ ଏହି ପ୍ରତିବନ୍ଧକକୁ ଉଠାଇ ଦିଆଯାଇଥିଲା।
